為退休鋪路 C朗加入做YouTuber
網絡時代，新一代年輕人其中一個夢想行業自然是當上網紅，成為著名YouTuber之類；只是勢估唔到已經39歲的葡萄牙球王C朗拿度都一樣跟得上潮流，昨晨便正式推出他的個人YouTube頻道名為「UR」。C朗更以他的招牌入球招式「Siu」玩食字，食落「訂閱」的英文Subscribe，改成「SIUUUbscribe」，呼籲球迷粉絲記得訂閱他的「UR」頻道。
在「UR」頻道首段發放的一分鐘短片，C朗在片中表示：「我有個驚喜畀大家，全新的YouTube頻道。SIUUUbscribe（訂閱）同加入CR7大家庭啦！」頻道中現時已有9段片，標題及內容諸如「會見喬治娜（C朗女伴）」、與兒子的踢腳挑戰、「這個與那個」有關C朗對運動員的喜好選擇，例如米高佐敦或老虎活士等。
C朗聲言在他的專屬頻道上，會分享他在球場以外不為人知的一面，同時更會不時邀請神秘嘉賓訪問等。他補充：「我好開心喺我人生中加入呢個計劃，呢件事喺我腦入面好耐，依家終於有機會實行。我一向好享受透過社媒同我嘅粉絲建立良好密切關係，而YouTube將會提供更大平台畀我去做，大家會知得我更多。」
