城城歌舞字畫 紅館創先河
「Aaron Kwok城堡」空降舞台
「 郭富城 ICONIC世界巡迴演唱會2024——香港站」前晚在紅館開鑼，全場座無虛席。除了華麗舞台及出色歌舞外，城城更表演潑墨畫。力求創新的他表示要將歌、舞、字、畫融入演出，台下觀眾掌聲雷動以示讚賞！
前晚郭富城在紅館舉行首場演唱會，除了太太方媛偕兩寶貝女現身外，好友張智霖夫婦、蔡一智夫婦等均有捧場。城城與14位舞者一齊登場跳唱演唱會主題曲《EXIT》，他說：「大家好嗎？8年終於可以返嚟呢個舞館，呢個殿堂級嘅紅館為大家表演，好掛住大家！」
近年醉心書法及畫畫的城城在個唱中再創先河，邊唱《飛》時邊表演潑墨畫，令觀眾相當驚喜。他說：「呢8年覺得自己進步咗好多，呢8年大家都經歷好多時出唔到街，令我開始鍾意中國同西洋畫，因為覺得線條好靚，自己今晚好大膽喺呢個舞台上表演畫畫。正值疫情時，我做唔到自己嘅創作，換咗另一啲創作。啱啱大熒幕有啲畫面、圖案就係我畫，係記載我2024年8月13日喺紅館同大家分享我嘅作品，希望將來有機會同大家分享到我一啲畫作，一樣都係我創作， 『四合為一』歌、舞、字、畫，好唔好？」
展示30張自創書法
好戲在後頭，魔幻舞台終於出現！台上機關啟動後，「Aaron Kwok城堡」空降紅館，戴上皇冠的城城坐在寶座上，在17位舞者伴舞下唱《國王的新歌》，之後他全程在半空的舞台上跳唱經典快歌。
城城表示創作了一首歌《您》，首度獻唱送給入場觀眾，還一口氣展示30張自創書法，他說：「代表咗我對每位歌迷呢30年嘅紀念同一啲印記，希望永遠留喺我心裏面同工作室裏面。當有日見唔到你哋，我會攞呢啲字畫出嚟感受你哋，每幅字畫入面嘅『您』字係代表一年，有30張代表30年，希望將我寫落嚟嘅嘢喺我老咗、喺舞台上無法表演時，呢啲就係我最好嘅回憶，所以喺呢度好衷心多謝你哋畀咗好多支持我。」演唱會尾聲 ，城城與約30位舞者謝幕，最後發動全場觀眾做出《EXIT》的動作，大玩萬人人浪。
