劉威煌冇除衫 賴古淖文太弗
圓心願開騷 計劃旅行慰妻
劉威煌前晚在麥花臣場館舉行尾場演唱會，吸引多位圈中好友到場睇騷，台下星光熠熠！之前他曾表示有機會在演唱會除衫騷肌，但最後「冇找數」，他受訪時笑言之前看了古淖文的澳門騷，看見對方身形弗到漏，他不好意思獻醜！
一連兩場《2024劉威煌REunite Concert》前晚圓滿結束，吸引「中1生」羅啟豪、支嚳儀及「中2生」古淖文、黃劍文、陳俞菲、陳蒨葶、王玥、陳燕娜、王學琳等捧場。《聲夢傳奇2》亞軍黃洛妍擔任嘉賓，拉小提琴率先登場，之後「輕鬆啲」成員顏米羔、譚輝智、甘永傑、梁浩賢等上台接力合唱經典英文歌，大批粉絲湧到台邊跟他們握手，表現瘋狂！
Encore環節，劉威煌行到觀眾席跟古淖文及黃劍文合唱幾句《愛之初體驗》，然後請捧場的圈中朋友全部上台大合照，以及多謝陪他承受沉重開騷壓力的太太，最後劉威煌唱《普通人》為個唱畫上句號。
對於台下不時有粉絲大叫「仲未除衫」，劉威煌受訪時笑言：「睇嚟要回水！之前睇古淖文喺澳門演唱會騷嘅『野男本錢』，我呢啲小朋友唔好獻醜。其實我呢兩個月開始做運動操練，依家怕一除衫，聽日就俾人笑，不過我會繼續操練，希望遲啲影一輯相留念。（操好啲下次開騷找數？）操肌容易過我開演唱會，哈哈！」
之後他感觸表示完成兩場演唱會算是圓了心願，再開騷的機會不大：「今次主題係第4部曲嘅重聚，我當係最後一次開騷，因為舉行一個騷好難，要經歷好多複雜問題，我今次已經盡力，老婆真係好辛苦。」問到會送什麼禮物獎勵老婆？他說：「之前去旅行係我話事，去邊度佢都會陪我。今次就畀佢揀，我陪佢去，就算北極都照去，但老婆鍾意去歐洲。」
有請龍婷睇騷
問到可有邀請備受負面新聞影響的龍婷？劉威煌說：「其實《超級巨聲》同《中年好聲音》所有歌手都有邀請。（點解龍婷冇嚟？）我有喺群組邀請大家嚟，但邊位覆咗我都忙到冇時間睇，我真係處理唔到票務問題。（畀龍婷休息吓？）要休息就休息啦，唔係事事都控制到。」
