西班牙死過翻生 勢擒巴西
奧女足準決賽尾場巴西對西班牙，雙方亦曾在分組賽碰頭，當時西班牙大輪換下仍以2:0勝出。身為冠軍大熱門的「狂牛女兵團」之後八強戰對哥倫比亞又於出局邊緣死過翻生，驚險補時逼和2:2，再射贏12碼晉級，今晚再遇分組賽腳下敗將巴西，由B隊換回全主力出戰，有足夠信心再勝，西班牙讓一球要捧上盤。（HOY 76台周三3:00am直播）
西班牙在分組賽對巴西前，已經兩戰全勝穩得出線資格，故用B隊出戰，爭勝心也不及對手強，但巴西全場仍處下風。「女球王」瑪達完半場前失控凌空施展「裂頭腳」，被逐離場導致巴西輸波幾乎出局。瑪達被罰賽兩場，今仗依然只能作壁上觀。巴西近仗亦接連遇上傷員問題打擊，主力守將安東妮亞上仗對法國甚至未能出任後備，今仗仍難復出，整體實力無法與西班牙相比；西班牙上仗幾乎不敵哥倫比亞，初段輕敵嘆慢板先機盡失，能夠於補時7分鐘扳平兼互射12碼勝出，贏得極度驚險。今場當然不敢再掉以輕心，一眾王牌邦瑪迪、靴莫素及佩迪拉絲都會正選搏殺，有力順利贏波晉身決賽。
