4視帝唱「哥歌」 爭認頭號粉絲
《星星相識》演唱會圓滿落幕
《星星相識·齊盡興HAVING FUN TOGETHER演唱會》日前於澳門倫敦人綜藝館舉行，表演嘉賓位位紅星！4位視帝陳豪、馬國明、譚俊彥和陳展鵬均表示自小已視張國榮（哥哥）為偶像，齊齊爭認做頭號粉絲！
當晚表演嘉賓陣容鼎盛，包括胡楓、陳豪、馬國明、譚俊彥、陳展鵬、李思捷、阮兆祥、胡鴻鈞、王灝兒、周吉佩、羅啟豪、姚焯菲、鍾柔美、詹天文等。胡鴻鈞唱《到此一遊》揭開序幕，姚焯菲、鍾柔美和詹天文合唱新歌《CYA》，王灝兒則在男舞蹈員伴舞下唱《愛心灌溉》。
身兼主持的李思捷說：「哥哥嘅經典歌感動每一代樂迷，絕配嘅造型令人永遠難忘……舊年適逢係哥哥逝世20周年，哥哥生前好友陳太陳淑芬女士專誠為佢舉辦一系列紀念活動。今晚一班《中年好聲音》歌手將會藉住呢個舞台演繹哥哥嘅經典金曲。」
譚俊彥：哥哥睇住我大
《中年好聲音》歌手周吉佩、羅啟豪、譚輝智和顏米羔唱出多首哥哥的經典快歌，包括《Monica》、《H2O》等，炒熱全場氣氛，他們又與支嚳儀合唱《只怕不再遇上》和《緣份》，又把大家拉到哥哥的經典慢歌世界中。
至於4位視帝陳豪、馬國明、譚俊彥和陳展鵬分享對哥哥的印象，馬國明說：「其實我係張國榮國際歌迷會會員，因為我媽咪好迷佢，所以令到我都好迷佢，我媽咪仲改咗英文名Monica。」展鵬說：「我買第一盒Casette帶就係張國榮嘅歌，佢嘅歌到今日仲陪住我，好多時登台我都會唱佢嘅歌，所以我係佢超級fans。」陳豪說：「我做過哥哥電影《金枝玉葉》嘅茄喱啡，我都好喜歡主題曲《追》。」譚俊彥說：「哥哥睇住我長大，佢永遠都喺我哋心裏。」
當眾星獻唱最後一首歌前，陳淑芬上台說：「好想借呢個機會多謝大家，因為今次紀念展兩度延期，從來冇諗過今晚呢個Closing Event能順利完成……」接着所有表演嘉賓、主辦單位及冠名贊助和場地代表，合唱《共同渡過》為演唱會畫上完美句號。
