【粵語講呢啲】石罅米·牛唔飲水唔撳得牛頭低·揸旗；擔大旗·跌眼鏡；大跌眼鏡
梁振輝 香港資深出版人
假使有些大米掉進了「石罅」（石隙/石縫）中，相信只有雞隻那尖尖的嘴巴才能放進其中進行啄食。廣東人就有以下一個歇後語：
石罅米——畀雞啄
「啄」口語讀「deong1」；「雞」與「妓」的普通話讀音相近，或許這令廣東人以「雞」作「妓」的俗稱。「畀雞啄」諷刺只願把錢花在妓女身上的人。
示例1：
我細個嗰陣阿爺同我講話有個同鄉成日流連風月場所，出手都不知幾闊綽。
粵語片都有得睇，呢啲友通常善財難捨！
中晒，阿爺話啲人響佢背後叫佢做「石罅米」，淨係識「畀雞啄」！
「撳」，讀「今1-6」，指用手按；不少人誤寫成「㩒」或「拑」。如：「撳門鐘」（按門鈴）、「撳住搶」（喻強搶）。
現實中，若某人不是自願去做某件事情，他人很難可迫他就範。以下是一些相關諺語：
按牛頭吃不得草/牛喝水按不下牛頭
牛唔飲水唔撳得牛頭低（粵語）
牛唔飲水點撳得牛頭低（粵語）
吃草、喝水均表示做某件事情；意指用強硬脅迫的手段是達不到目的的。以下是同出一轍的西諺：
You can lead a horse to water, but you can't make him drink.
【你可把馬帶去喝水，但你不能令（迫）牠喝。】
示例2：
梁小輝，你做咩同黃小利響廁所打陳佐治？你應該知「打交」（打架）可以趕出校嘅！
劉Sir，我唔想㗎，係黃小利迫我嘅！
呢啲嘢都有得迫，「牛唔飲水點撳得牛頭低」；嗱，坦白從寬！
咁嘅，黃小利話「揼」（打）完佢請我食放題囉！
「大樑」指架在山牆或屋架上最高的一根橫樑，也叫正樑；也指主要的任務或責任人。「扛大樑/挑大樑」比喻承擔重任；廣東人也會用「揸旗/擔大旗」（持旗）來表示這個意思。
眼鏡通常用以矯正視力，讓人看得更清楚。「跌眼鏡」就是把眼鏡丟掉，丟了就是沒眼鏡，沒有眼鏡就看不清楚。有人就用「跌眼鏡/大跌眼鏡」來比喻看差一線；亦即事情的結果出乎意料，令人感到吃驚；香港人也會說成：
通地/一地都眼鏡碎
眼鏡掉在地上會爆裂以致碎片散落在地上。
示例3：
勢估唔到呢位超級巨星竟然做出傷風敗俗嘅嘢，令全人類都「跌眼鏡」/搞到「通地都眼鏡碎」！
