優質銀主盤唔會公售
湯文亮博士 紀惠集團行政總裁
老友近日收到不少銀主盤資料，樓價的確是低於市價，但沒有優質樓盤，大多數是低層以及方向不佳的單位，老友話，做得財仔，應該好醒目，點解會接受那些單位做抵押，如果賣唔走，財仔可能有損失。老友可能唔明白，財仔的銀主盤並不是沒有優質貨，但很多時由業主的自己友買番，是不會在市場公開發售，就算業主冇能力買番，財仔都會以低價買下來，以後才公開發售。
況且現在又不須要付BSD、SSD等辣招印花稅，所以，在市場上搵唔到優質銀主盤，不過話分兩頭，如果市場上出現優質銀主盤，反而大事不妙，代表市場缺乏購買力，連低於市價的優質銀主盤都冇人買，樓市想唔跌都唔得。另方面，現在問財仔借錢的人很醒目，知道財仔冇情講，脫期供款立刻沒收物業，變成銀主盤之後立刻出售，比較優質的物業都唔會攞去問財仔借錢啦。
樓市並非一潭死水
講開又講，開例會時，有同事話現在做地產行業生意的人好慘，被銀行call loan不在話下，如果要蝕讓放售一些物業，又會收到不少幸災樂禍的說話，甚至有學者在樓市研討會指出，樓市現在是一潭死水，不過，同事們不同意，雖然樓市下跌，大家掙扎求存，的確很辛苦，但點都唔可以話樓市是一潭死水，而事實上樓市現在是冇水，不是一潭死水。至於樓市點解冇水，很簡單，就是銀行唔放水，仲有，唔放水仲未夠，現在仲收水，銀行唔支持樓市，樓價有乜辦法唔跌。
