聲夢3小花開騷 炎明熹「找數」撐場
各有各忙 等公司安排「合體」
「聲夢3小花」姚焯菲（Chantel）、鍾柔美（Yumi）及詹天文（Windy）前晚舉行演唱會尾場，傳遭無綫雪藏的炎明熹（Gigi）早前預告會睇騷撐好姊妹，前晚果然兌現承諾，坐足全晚睇騷。3小花受訪時坦言完騷後未知有否時間跟Gigi見面，但強調大家一直有聯絡，友情未變過。
姚焯菲、鍾柔美及詹天文於麥花臣場館舉行一連兩場《音樂出沒 Let's play together》演唱會，前晚尾場星光熠熠，「聲夢戰友」冼靖峰、林智樂、林沚羿、林君蓮等捧場，傳被無綫雪藏的Gigi亦坐足全晚支持好姊妹，離場時大讚好睇。
約兩小時演出，3小花盡施渾身解數，勁歌熱舞兼演奏樂器。Encore環節，她們唱《給自己的信》時，Windy忍不住感觸落淚，3女更異口同聲感謝入行以來幫過她們的人及粉絲。
3小花完騷後受訪，談到Gigi特意前來捧場，她們表示很感動：「佢仲去咗後台搵我哋，叫我哋加油，又話好掛住我哋，我哋仲笑佢身上有陣香氣，原來佢特登買咗件新衫着住嚟捧場。（點解台上冇提佢？）因為rundown好密，所以用『聲夢』統稱。」問到何時與Gigi「合體」？Chantel說：「都係等公司安排，佢應該都忙學業或工作，但我哋私底下有保持聯絡。（完騷同佢聚吓？）希望有時間，不過我嘅寒假就快完，仲有個零禮拜就要離開香港。」
Yumi不滿意放榜成績
Yumi透露趁Chantel離港前，希望爭取時間拍新歌MV，Windy則說：「9月我就要同Yumi升大學，我自己都未知會唔會離港繼續升學，亦唔知日後大家會唔會身處唔同嘅地方，今次我哋3個一齊開到演唱會，仲見埋Gigi，真係好珍惜。」Yumi坦言不滿意放榜成績：「有少少唔開心，呢幾日喺度諗緊條路應該點行。（因為讀唔到自己想讀嘅科目？）可以咁講，我對自己要求好高，依家面前好似好多選擇咁，會再深思熟慮。（想留喺香港讀書？）係，但要慢慢安排。」Chantel指兩位好友日前放榜，搞到她心情緊張，又指返學便要考試，9月22日18歲生日亦未能返港與粉絲慶祝：「相信下次返香港係12月嘅事。」
