當眾向「表弟」林家謙邀歌 鄭秀文騷手臂老鼠仔勁得意
香港文匯報訊 天后鄭秀文（Sammi）昨晚在紅館舉行第二場「You & Mi 鄭秀文世界巡迴演唱會2023」（Rescheduled ），邀請林家謙擔任表演嘉賓，手拖手邊走邊唱《親密關係》，全場起哄。Sammi好友張衛健、導演谷德昭、溫碧霞與丈夫何祖光、少爺占、陳敏之、DJ主持西瓜與傑傑等前來捧場，開騷前眾人在後台，與Sammi一比一人型紙板打卡，又玩夾盲盒扭蛋，非常歡樂。Sammi與嘉賓林家謙在台上笑稱「表姐弟」，並即場向「表弟」家謙邀歌，笑言公器私用；Encore 環節Sammi還展示手臂結實的「老鼠仔」 ，勁得意。
第二場演唱會，Sammi換了新衫，以「白色小飛鳥」造型歡迎表演嘉賓林家謙出場。她笑問家謙歲數後稱他做「表弟」，然後二人在台上以「表姐」和「表弟」相稱，有說有笑。Sammi對家謙說：「呢個演唱會原本喺舊年舉行，嗰時邀請你，好快就答應做我嘉賓。其實我今年再搵嘉賓都好驚，因為邀請咗人哋之後自己撻咗Q，人哋預晒時間，我內心好抱歉。今次再膽粗粗搵林家謙，點知又一口答應，真係好多謝你。」還即場邀歌，家謙亦一口答應，Sammi興奮地說：「你應承咗㗎啦 ，哈哈，我公器私用。」
抽中「阿燥」盲盒秒變乖
然後家謙送Sammi小禮物，他說：「其實唔係好貴重嘅嘢，出邊應該未入到貨，我喺Pop up店買冇貨，呢個我上網買，係一個《Inside Out》（電影）嘅盲盒。」Sammi開心說：「多謝，我最近首歌叫《盲盒》呀！」家謙說：「我覺得啱你首歌，同埋『盲盒』呢個意思好好，我哋每人每一日瞓醒後都好似抽盲盒，因為遇到嘅事情、情緒都預計唔到，無論抽阿樂、阿怒、阿尷都好，都希望你好好擁抱每種『腦朋友』。每種情緒都可以令我哋感覺到自己嘅存在，然後好好咁過每一日。」Sammi大讚：「講得好，多謝表弟。」
家謙本來請Sammi返後台拆盲盒後告訴他抽到什麼，點知Sammi爽快即場拆，還搞笑地將包裝紙丟到地上，家謙連忙執起，全場大笑。結果揭曉Sammi抽到紅色「阿燥」，家謙笑說：「啱晒你啦，你頭先咁樣。」然後學她丟垃圾紙到地上。Sammi即刻變乖，說：「好，我收斂，好好控制自己嘅情緒。」家謙說：「收埋佢，唔好爆出嚟。」還吩咐她帶埋包裝紙垃圾返後台。之後家謙演唱Sammi經典金曲《衝動點唱》，還改了一句歌詞變成「原來是我衝動翻唱」，全場歡呼。
與歌迷約定一齊變老
Encore 環節，Sammi演唱《盲盒》 、《如果我們不再見》和《我們都是這樣長大的》。她說：「嚟到第二場，一切緊張和拘謹都拋開晒，多謝你哋入場。」她笑指觀眾隨着年紀變大，嗌「Encore 」和「Sammi」的聲音都變弱，叫觀眾多做運動，還展示手臂結實的「老鼠仔」，得意地說：「睇唔出我就嚟52歲？犀利？應承我，一齊變老，好唔好？」全場觀眾大叫「好」。
