父女檔出騷與粉絲Battle 陳柏宇籲為運動員打氣
香港文匯報訊 昨日陳柏宇（Jason）及其女兒Abigail（Abi）齊齊出席商場活動，經常於社交媒體分享一家四口互動的Jason難得攜同愛女現身，Jason笑指：「Abi聽到有彈床玩就即刻話要跟埋過嚟。嚟緊放暑假都計劃咗一家人去唔同地方遊玩兼做運動。」其後Jason即刻瞓身落場同囡囡一齊與粉絲Battle，挑戰難度升級版的「123紅綠燈」及「彈床糖黐豆」，囡囡全程投入，Jason亦全程護航，場面緊張刺激又溫馨。
難得一眾粉絲專程到場支持，Jason玩完遊戲更即場獻唱《有天》，掀起全場高潮，囡囡Abi更化身小粉絲為爸爸打氣。被問到會否教女兒們唱歌，Jason回應：「作為家長，希望提供機會畀小朋友自己多探索。家姐（Abigail）比較活潑好動，特別鍾意做運動、游水、曬太陽。今個暑假就啱晒佢啦，一家人可以一齊睇國際體育賽事。大家都要多多支持睇直播，為一眾運動員打氣。」Jason之後為參加遊戲的粉絲送上特備禮物，並與現場觀眾影大合照。
