狂人求洗底 領紅龍重生
名將比拿美接掌威爾斯
正所謂人誰無過？退役威爾斯球星比拿美球員時代以高速度及出色射術見稱，同時更以脾氣火爆經常鬧事馳名。不過，已經44歲的他，昨日正式坐上威爾斯代表隊主帥之位，他誓言如今的他已經「收火」，他希望球迷能夠用時間去看清楚他的改變，也希望他愛國的熱情，能助他帶領「紅龍」做到最好。
威爾斯在今屆歐國盃的外圍賽附加賽決賽中，互射12碼飲恨不敵波蘭，無緣正在德國開打的決賽周。主帥佩治離職後的空缺，比拿美據報最終是爭贏包括法國傳奇亨利、格魯吉亞主帥沙洛及牛津聯領隊布京咸而獲得聘用，並與威爾斯足總簽下一紙4年合約。
球員時代先後効力過包括曼城、利物浦及紐卡素等大球會，在1998至2013年間，共為威爾斯上陣78場攻入19球，在威爾斯史上射手榜排名第7，今次回歸「祖國」執教，比拿美坦然其愛國之情較以往更強：「可能因為我一直住喺英格蘭同比利時，所以我都冇為意原來『威爾斯』對我係咁重要，但我一直都有留意住威爾斯。我嚟唔係為錢，之前我都唔知自己係咪想做呢份工，只係當我參與（競逐帥位）得更多，就越清楚明白我好想做。」
比拿美其實未有正式執教頂級球隊經驗，之前僅曾隨般尼及安德列治工作，但他心中有着自己的一套理念：「對我嚟講，我唔鍾意輸，更唔可以唔贏，呢兩樣係有分別。唔止係足球，甚至講你嘅人生，假如當你以所擁有，盡全力去做到最好，你已經係贏咗。如果我冇做好準備，冇盡到力就失敗，我會好介意。」
高球桿毆懷斯成「經典」
球員時代，比拿美的火爆性格曾與領隊桑拿士爆出激烈爭拗，更曾傳出他以高爾夫球桿毆打利物浦隊友懷斯，對於外界質疑他的性格問題會影響工作，他回應：「我明白外間對我嘅睇法，經驗不足同以往嘅脾氣問題，希望經過幾年或幾個月後，大家會明白我已經收晒火，而我亦冇俾人炒，會累積到經驗啦！我唔完美，但所有我做過嘅過錯，我會承認同面對，我想做個最好嘅人，係我心底渴望。」
威爾斯曾在2016年於歐國盃取得季軍，是歷來最好成績；對上一次打入世盃決賽周則是2022年，而取得2026世盃決賽周入場券將是比拿美上任後的首要任務。
