古佩玲企C位 否認搶元老鏡
跟足公司安排拍《愛·回家》新片頭
無綫處境劇《愛·回家之開心速遞》近日換新主題曲及新片頭，一眾演員於新片頭又跳又唱，身為後輩的古佩玲被發現企C位，比「元老級」演員更突出！不過她否認獲力捧，拍攝時全程聽從公司安排，自己從沒想過企C位。
劉丹、林淑敏、許家傑、呂慧儀、張景淳、古佩玲與陳浚霆等，昨日出席處境劇《愛·回家之開心速遞》宣傳活動，現場播放劇集新片頭及由姚焯菲主唱的新主題曲，眾演員在新片頭內又唱又跳，古佩玲更企正C位，被指成功上位！她受訪時解釋：「因為係Top Shot，其實係大家喺外圍包住中間嘅丹爺，我從來冇諗過要企咩位置，都係公司安排。我只顧住努力練舞，因為我怕甩Beat影響大家。」陳浚霆笑言：「我要喺片頭傍實佢，希望佢俾公司力捧，帶挈我都多啲戲份。」
陳浚霆指新片頭拍了一整天，讚古佩玲當日是最後一個走的女演員，比她更遲的只有周嘉洛，因對方要包尾跳freestyle。古佩玲稱想不到片頭會運用大量Top Shot，當日她穿鬆身上衣，一直擔心走光，幸好滕麗名在她背後幫手拉緊衣服。提到姚焯菲想客串演出，陳浚霆表示無任歡迎：「佢可以演表妹，同周嘉洛有感情線。我見過佢真人，覺得佢好得意。」
呂慧儀不覺港姐合約條件辣
聲音沙啞的呂慧儀表示近日天氣反覆致感冒，問到拍新片頭時有否自創舞步？她說：「冇，我連簡單嘅舞步都跳到『閃』到腰！令我回想當年選港姐時，要喺短時間內學習大量舞步。」提到古佩玲在片頭企C位，比「元老級」演員更突出，呂慧儀表示不介意：「中間點都係丹爺嘅，佢就好似學校嘅校監，大家圍住一個心形去包圍丹爺。」
提到今屆港姐有多位面試佳麗疑因合約條件太辣而退選，更有人與模特兒公司有合約仍來參選，模特兒出身的呂慧儀寄語想參選的女士不能貪心：「當年我都要自由身先可以選港姐，好彩老闆答應幫我解約。其實想選美嘅女仔要尊重比賽規則，魚與熊掌唔可以同時兼得，倒不如諗清楚自己想做乜，港姐合約我唔覺得有乜嘢辣，都係有供有求，因為公司已經投放咗資源。」
