否認見死不救 安仔：屋企冇痰罐
做人向前看 冷對前妻指控
一直被視為模範夫妻的郭晉安（安仔）與歐倩怡於5月宣布兩年前已分居，震驚全城！早前歐倩怡於網上節目聲稱4年前曾患大病險死，暈倒後醒來發現自己的頭塞進痰罐，卻被枕邊人漠視。昨日安仔受訪時稱家中沒有痰罐，否認「見死不救」的指控。
郭晉安、陳曉華、羅子溢、何依婷、陳星妤及郭柏妍等，昨日為無綫新劇《金式森林》（暫名）拍攝一場慈善基金晚宴大場面。提到安仔與前妻歐倩怡於5月宣布兩年前已分居，現在要跟陳曉華拍分手戲，可會觸景傷情？他說：「冇，做戲還做戲，分得好清楚。（已經放低？）每日都要放低，其實對我冇影響，過去就過去，要向前看。」
歐倩怡早前於網上節目聲稱4年前曾患大病險死，當時發燒、呼吸困難及失禁，之後更暈倒，醒來時頭塞進痰罐，卻被枕邊人漠視，沒協助送她入院，被形容為「見死不救」！安仔對此表示：「唔係真嘅嘢唔想講，唯一可以講嘅係我屋企間房係套房，唔會有痰罐。（係歐倩怡親自講！）都已經分開咗，各有各生活，亦好難控制人哋講咩，而且唔係真。我喺娛樂圈都適應晒，唔會高調回應。」
陳曉華想拜安仔為師
提到歐倩怡自爆玩交友App，問他會否試玩？安仔笑言自己相信緣分：「人去到某個階段唔會就咁停嘅，任何事情都會發生。（試玩交友App？）其實我好白癡，自己嘅網上平台都唔活躍，電子產品更加唔熱衷。（唔想再提以前嘅事？）大家唔去提就唔提，向前看！努力追求更好嘅生活。依家專心工作，都係為咗對小朋友。」
陳曉華透露為了穿貼身晚裝，事前減肥兩日。她又稱很開心跟安仔合作，獲益良多：「即使冇佢嘅場口，我都有問佢意見，佢都講咗好多新嘅諗法，我真係好想要佢個腦袋。（你拜佢為師？）唔知佢願唔願意收我為徒，又唔知拜師要啲乜嘢，應該斟茶可以啩？」
而何依婷稱成為人妻後第一次拍床戲，非常緊張：「監製好好，特別安排何廣沛做我現任男友，羅子溢做我前度，仲有回憶嘅床戲。」她讚羅子溢有風度兼拍親熱戲經驗豐富，故大家事前已夾好，點到即止。問到有否向老公備案？她表示老公絕對支持和體諒。
