美女與野獸 溫網打出火
情侶檔夾擊 施維列夫出局
正在倫敦舉行的溫布頓網球賽，昨晨上演的男單16強賽事，4號種子德國施維列夫在領先兩盤下，最終被13號種子美國的費列茲反三淘汰。不過，賽事焦點是費列茲的索爆KOL女友莉杜在場外對曾捲入虐打女友的施維列夫窮追猛打，完場後兩位球手據報亦為此出現爭拗，施維列夫受訪更怒轟有人行為過分！
法網亞軍施維列夫最終以6:4、7:6（7:4）、4:6、6:7（3:7）及3:6不敵費列茲，後者打入八強後將與來自意大利的25號種子梅錫迪爭入四強。27歲的施維列夫，因為涉嫌在2020年虐打前女伴柏達雅被控，雖然最終未被判罪，但去年卻達成協議向柏達雅給予約22萬美元作和解。此外，他也曾因涉嫌虐打另一位前女友、網球手莎莉寶娃受到ATP男子網球協會進行15個月調查，最後因證據不足未受處分。
就在今仗比賽途中，近年人氣爆燈、於TikTok得到1,720萬點讚的費列茲女友莉杜，便在網上發文：「姊妹們嗌大聲啲啦！」賽後則再出「鋪」，穿起短裙兼拿着酒杯，並寫上：「當你男人為女士們贏波！」明顯是要寸爆涉嫌多次打女人的施維列夫，為女性發聲，不過，事後這兩文均已被刪除。
施維列夫輸波之後，據報與費列茲在場上出現爭拗，賽後受訪則不滿地說：「佢（費列茲）嘅團隊非常識得尊重，我諗佢嘅教練、體能師同第二教練都好值得尊重；但喺佢團隊席入面，有個別並非來自網球圈、又唔係場場睇波嘅人，有啲過火囉！」
祖高域晉級 鬧爆球迷騷擾
另邊廂，7屆溫網男單冠軍祖高域的傷癒奇跡之旅亦繼續前行，昨晨他在16強戰以直落三盤打敗了15號種子丹麥的魯尼。可是，比賽途中不斷有球迷高聲為魯尼打氣，卻被祖高域批評為刻意騷擾，賽後開腔還擊：「對所有喺度同識得尊重嘅球迷，我衷心多謝你哋，但對所有唔識尊重球手，即係針對我嘅……早抖啦！」對於主持人指球迷只是叫着魯尼名字，祖高域回應：「我打巡迴賽廿年，我知道所有蠱惑嘢啦！信我，呢啲人影響唔到我嘅！」火氣十足的祖高域，八強會對澳洲球手迪米拿亞。
