神龍救C朗 爆喊闖八強
撲3球12碼 領葡萄牙贏波
儘管是身經百戰、得獎無數，但大名鼎鼎的葡萄牙球王C朗拿度在球場上仍會遇上悲傷失意一天。昨晨C朗帶領葡萄牙在歐國盃16強激戰斯洛文尼亞，在苦戰至加時上半場結束前獲得12碼，C朗親自操刀卻被救出，擔心成為出局罪人讓他流下男兒淚，要隊友安慰。可幸在互射12碼階段，卻有「神龍」迪奧高哥斯達挺身而出，創歷史連救3球，領軍取勝殺入八強，救國救C朗，一戰成名！
賽前被看好可輕鬆取勝，但葡軍昨仗卻陷於苦戰，空有大量控球權，卻未能打破悶局，雙方法定時間互交白卷。加時上半場結束前，葡軍前鋒迪亞高祖達禁區內被侵犯獲判極刑，C朗操刀卻被斯洛文尼亞門神奧比歷捉到路救出，C朗即時失意抱頭，完半場時更淚流滿面，需要多位隊友輪流上前安慰。尾段葡萄牙再有老將中堅比比犯錯幾乎失守，但多得迪奧高哥斯達奮勇救出對方單刀波，保住互射12碼機會。
到最後12碼比拚，斯洛文尼亞先射，頭3球竟然全被迪奧高哥斯達救出，而葡軍則有C朗將功補過先射一針見血，再有般奴費南迪斯及貝拿度施華射入，以3:0取勝，闖入八強後將會對戰法國。
生涯之前13次為葡萄牙主射12碼全中的C朗，今場險成罪人，賽後他表示：「就算係最強嘅人都會有唔好嘅日子，我喺球隊最需要我嗰陣跌咗入谷底，我本來好失落，但依家開心晒！足球就係咁，講時機！無論我成功定失敗，我永遠都會為呢件波衫付出所有，只要球隊需要有人負起責任，我就會企出嚟！」
卡斯拿斯欽點接班人
至於成為贏波英雄的迪奧高哥斯達，現年24歲，効力於葡超勁旅波圖。前波圖兼西班牙國家隊門神卡斯拿斯曾經受訪欽點他是自己接班人，可見其實力。上屆世盃，此子曾經犯錯累球隊出局，備受批評，但他今次卻創造歷史，成為歐國盃史上首位在點球大戰救出三球門神，也是首次有門將在經歷百二分鐘及互射12碼仍能保持不失門將。
迪奧高哥斯達賽後說：「我諗呢場係我人生最好表現比賽，或者係最有作用啦！我哋當然分析晒對手，但佢哋會變嘛，我只係帶住勇氣落場，話畀自己聽一定要救出，依家真係好開心。」這位波圖門神強調一直對自己及C朗都有信心：「所有人都會犯錯，重點係犯錯之後點做啫！」
