關嘉敏神還原譚輝智 獲「拉姑」伴舞 陶大衛贏「終極扮嘢王」成雙料冠軍
香港文匯報訊（記者 梁靜儀）王祖藍、李思捷與阮兆祥主持的《福祿壽訓練學院》前晚假電視城舉行終極對決，最終由陶大衛以「一人福祿壽」的精彩演出成為大贏家，分別與演出「穿Heels的男人」的吳兆麟齊齊奪得「專業評審大獎」，還同時獲全晚最高分贏得「終極扮嘢王」殊榮，成為雙料冠軍，他更贏得價值6位數字的電動車；而乸埋口面扮譚輝智跳唱《屈到病》的關嘉敏， 就算帶埋「拉姑」上台都與獎無緣。
當晚王祖藍的媽媽、太太李亞男和兩個女兒都有到場欣賞，打頭陣出場的表演嘉賓汪明荃（阿姐），身穿黑色高衩旗袍，獻唱國語歌《舞女》，又唱又跳十分有睇頭。阿姐唱完後， 王祖藍、阮兆祥和李思捷向她頒發「榮譽博士」，祖藍說：「阿姐係『福祿壽』嘅伯樂，冇佢我哋冇今日。」阿姐說：「與『福祿壽』正式合作已是14年前，唔敢講伯樂，但自己作為前輩真心想畀後輩多啲機會，一個人的真心一定要被看見。」向來專業的阿姐笑言今次造型是精心設計，在練習上都有下苦功，是一個大挑戰，不過她就不會再扮嘢。
之後輪到最後十強包括陳柏曦、陶大衛、彭建豪、趙頌宜、黃建東、關嘉敏、葉泓聲、林樂熙、周百恩與吳兆麟施展渾身解數爭奪「一級榮譽生」殊榮，當中陶大衛演出「一人福祿壽訓練學院」，扮學員唱《第四晚心情》、《今晚夜》及跳鋼管舞，先獲得專業評分47.3分，得到「專業評審大獎」的他眼濕濕地說：「 跳鋼管舞，講真係好辛苦。」
吳兆麟唱到趴地妖味足
同樣得到專業評分47.3分的「專業評審大獎」得獎者吳兆麟，當晚以超緊身短褲、高踭鞋登場，唱到趴地的他又輕咬領呔，妖味十足令全場high 爆， 其落力演出獲經常扮女人的王祖藍笑說：「後繼有人。」江美儀就大讚吳兆麟剛柔並重，並給予高分。
上次扮王菲幾可亂真的關嘉敏，今次扮「痰輝智」演出「屈到輝智病了」，乸埋口面扮輝智配以機械人式舞步，並有忠粉「拉姑」上台伴舞，惜輸個馬鼻未能得獎。
黃建東扮金髮阿Ken被批太貪心
至於參加比賽經驗無數的黃建東， 戴上金色假髮打重鼻影扮阿Ken，表演彈琴及跳舞，被評審批太貪心， 不知想表演什麼。彭建豪扮杜德偉跳唱《脫掉》，福字貼臀部是想一團和氣，評審曾志偉認為條底褲可以細條啲。 錢嘉樂笑指呢個年代的杜德偉應該問吳君如，不應問他，因為君如鍾意睇騷。21歲的趙頌宜上次扮蔡琴，當晚就扮93歲夏蕙BB上頭炷香。
陳懿德打側手翻失準負傷
而兩位「扮工室助理」的郭珮文及陳懿德（德德）以低胸性感晚裝上陣，笑言終於可扮返個人。她們又穿上粉紅Bra top扮Twins打側手翻，不過德德臨演出在台上熱身時不慎跌坐在地上，更整傷左腳， 以致打側手翻時失準，演出後強忍痛楚一拐一拐返回後台。再上台時都按着左腳，幸未有影響主持節目。節目結束後曾志偉亦有上前慰問她，德德一度抹眼似是想哭。
志偉讚《福祿壽》為TVB添丁
對於最後一次擔任「扮工室助理」，她們都大感不捨，德德更稱見到台前幕後想喊的感覺很強烈。提到在眾多造型中哪個最深刻？德德就稱是「一碌竹」的造型。德德更大讚郭珮文側手翻非常了得，原來郭珮文在孩童時期就已經有接觸：「因為我鍾意接觸新挑戰，所以我之前才會參選港姐。」郭珮文表示和德德合作好舒服。暫未知之後能否有機會繼續和德德合作，問到做完這個節目後，會否想向諧星發展？郭珮文說：「我唔抗拒任何嘅工作，因為我暫時仲未知自己適合啲咩，我想拍戲，覺得拍戲好好玩。」
評審之一的曾志偉指節目為TVB添丁，發掘了很多人才，要在台慶為他們安排表演環節，又笑指下個《思家大戰》可找扮李思捷的葉泓聲做，因平好多；以及配音組請林樂熙一個人就搞掂晒，慳返budget。
陶大衛認與TVB洽談合約中
陶大衛賽後表示沒想過得獎，因只抱着做好演出的心態，向這個舞台致敬，又讚每個參賽者的演出都很出色。 對於自己的表現 ，他認為可以做得更好，因表演鋼管舞時，踢到跪在下面的人差點跌倒，他夾硬爬上去才成功。本身是網絡素人的陶大衛，被問到可會簽約TVB？他表示正在洽談中，他由細到大都很喜歡TVB，有機會當然想簽約，希望未來做更多喜劇作品。至於獎品電動車可會自用？他笑說：「 我有車牌 ，但右軚車要再考慮，（平讓出去？）唔使！」
譚輝智：使唔使似到咁
屈居亞軍的關嘉敏，受訪時表示沒有覺得唔抵， 反而覺得執到：「唔係因為呢個節目，我都未試過扮嘢，所以我嘅經驗只得4個月，我唔會不開心，攞亞軍已經執到。冠軍之前有好多作品，係實至名歸。」 扮嘢被激讚神似的她，表示都會想向這方面發展。她又感謝導師之一的李思捷眼光很好，上次扮王菲和今次扮譚輝智都是他的意見。問她私下可認識譚輝智？她說：「我唔認識佢，相信將會認識，我睇晒佢所有的訪問片，學佢啲表情。」而譚輝智本尊事後在Ig限時動態亦有轉發關嘉敏演出的片段，並以7個字回應說：「使唔使似到咁LOL！」
好兄弟顏米羔和劉威煌亦在「輕鬆啲」的社交頻道開直播，顏米羔更險些啃親：「正到不得了，食吓飯都爭啲啃親，真係笑到爆，原來係關嘉敏扮，我都唔知。我可以話你知，連當事人望到都嘩一聲。」劉威煌亦大讚神似：「其實要佩服，冇諗過係女仔扮，我幾鍾意佢啲神髓。」
