Lolly Talk沙灘音樂節性感獻唱 Tyson Yoshi明年辦婚禮唔急造人
香港文匯報訊 6月29日至 30日於愉景灣舉行的《The Nextwave 沙灘音樂節》大受好評，入場樂迷盡興而歸。樂隊Rover打頭陣出場，怎料突然落大雨，不過Rover越大雨越投入。Rover仲話去過台灣音樂節，覺得台灣的觀眾好熱情，原來香港觀眾更瘋狂。佢哋仲想同P1X3L同台表演，笑指對方檔期比自己忙。
而P1X3L第一次參加沙灘騷，未演出已經好興奮，Lolly Talk呢日性感現身，佢哋就話要襯返夏日感覺，所以勤力做運動健身：「今次係第一次參加沙灘騷，好鍾意今日現場嘅氣氛，我哋都玩得好興奮。不過今日阿蛋因腳傷仍未能參表演。」
周殷廷想搞戶外騷
周殷廷呢日出席音樂會就呻唔夠喉，仲坦言想搞戶外騷：「今日冇打底啊，如果濕身就由它，我覺得呢個就係做戶外騷最正嘅。（想唔想插水跳入人群中？）我怕台下冇人接我啊，但可以同觀眾互動係好開心，我都想搞戶外騷。」
剛宣布求婚成功嘅Tyson Yoshi呢日一如預期被要求除衫，不過佢就唔多滿意自己嘅身材，仲要攝影師影近鏡檢查：「因為𠵱家嘅體脂唔係最滿意，但今晚實在太熱，所以死就死啦。（𠵱家係求婚後幸福肥？）啱啱同女朋友一齊嗰陣時就係肥仔，但唔知點解踏上咗呢條除衫嘅單程路之後，就成日睇住自己個身形，朝早起身照吓鏡，然後上個磅量一量，已經有少少職業病。」Tyson仲話婚禮大日子終於落實，而婚禮嘅兄弟團就要開個報名表畀大家報名：「婚禮會於明年舉行，因為未婚妻催促快D搞，所以呢日確定了亦落埋訂金。不過2025年亦有計劃開演唱會，希望完成演唱會再辦婚禮，到時就可以輕輕鬆鬆放假。（要準備造人大計？）造人就多等一兩年先，𠵱家唔想揸七人車，因為啱啱買咗架兩座位跑車。」
