王祖藍想搵女陪 彭慧中平價𢱑撈
《一條麻甩在東莞》受歡迎 獲商會斟拍節目
由王祖藍單拖主持的節目《一條麻甩在東莞》大受歡迎，帶挈他獲不少東莞商會邀請拍節目，祖藍坦言希望公司增加拍攝經費，讓他帶幾位女藝人同行，因他不想再次「一條麻甩」！彭慧中聞言後即向祖藍自薦，更聲稱自己的人工很平，認真懂得把握機會！
王祖藍、彭慧中、林秀怡、關楓馨與袁潔儀等昨日宣傳無綫綜藝節目《一條麻甩在東莞》，於節目中負責介紹東莞美食及景點的祖藍獲頒「美食大使」證書。祖籍東莞的他表示剛帶「4條女」回鄉吃喝玩樂兼購物，他說：「同阿媽、老婆、兩個女去，囡囡鍾意食魚，所以帶佢哋食雞泡魚羹、黃皮頭煎蛋，睇完龍舟再去超市。依家可以自駕唔使託運，即日來回好方便。」
被街坊追問東莞美食
祖藍指《一條麻甩在東莞》大受歡迎，經常被街坊追問東莞有何美食：「連我阿媽都問我，但我太忙，唯有叫佢翻睇，節目已經係一個攻略，教大家玩盡東莞。」他自爆收到不少東莞商會邀請拍節目，問到可會考慮親自帶團？他說：「下半年會去內地拍節目，甚至外國亦聯絡過我開拍節目，最理想係有熟悉當地嘅藝人一齊拍，不過就未必會去太太李亞男嘅出生地，因為加拿大出名都係中餐，但要介紹中餐又唔使去加拿大。」祖藍笑言最想公司增加經費，可以帶幾位女藝人同行拍攝：「我唔使再做一條麻甩。」
醒目的彭慧中聞得祖藍有意帶女藝人同行拍節目，她即舉手贊成，並笑言：「我啲騷錢好平！」早前與林秀怡到深圳拍飲食節目的彭慧中透露，稍後會原班人馬再次玩轉大灣區，所以現在要先減肥，待拍節目時可以盡情吃喝：「我冇上磅，依家應該有一百零幾磅，拍之前唔食太多，就唔怕到時上鏡會肥。」祖藍羨慕彭慧中越吃越瘦，反而他吃出一個大肚腩，彭慧中即取笑他是幸福肥，他沾沾自喜說：「唔好意思。」
