內地拍劇陳煒勤返港照顧老公 張曦雯未有結婚生B計劃
香港文匯報訊（記者 梁靜儀）張曦雯（Kelly）、蕭正楠、陳煒（煒哥）、譚俊彥、黎諾懿及龔嘉欣等，昨日到電視城為方力申與黃翠如主持的煮食節目《拍檔廚房》的延續篇《拍檔食堂》錄影。已為人妻的煒哥即使要在內地拍劇，仍堅持每隔兩三天便返港一次，目的是要做好家庭主婦本分照顧老公，但她強調自己是好願意付出；而正在蜜運中的Kelly則坦言未有結婚成家的打算。
Kelly的廚藝都是上網睇短片自學，算是無師自通，而今次在節目中她會跟大廚學習，但就因為拆龍蝦被大廚投訴：「好似拆龍蝦咁，因為我都未做過，有啲手忙腳亂，被大廚鬧，話我切得好肉酸。」她又坦言平日甚少下廚，不過經過今次有可能會再重拾煮食的興趣。
蕭正楠羨慕翠如赴巴奧
早前Kelly與男友拖手在中環行街被偷拍，事後在網上瘋傳，Kelly大方說：「其實嗰日係生日，當時就係行緊去食飯，如果唔係我唔會化妝，男友都見到有人影相，當係生日留個紀念，我哋亦從來冇避忌。」問到男友可有給她驚喜？Kelly笑說沒有：「冇呀，都係普通食餐飯。」二人拍拖多年，問到可有結婚計劃，Kelly不諱言自己沒有這個想法：「男友想的，我冇乜諗呢樣嘢，（會唔會有咗BB先計劃結婚？）我連結婚都唔想，點會想生BB？遲啲先算，不過有都係一種祝福。」Kelly又透露將會演出一部喜劇，劇中會飾演特務。
黃翠如與老公蕭正楠一齊錄影，阿蕭更忍不住拿起一碟意大利粉大快朵頤，他笑指碟粉並不是太太煮的，不過她平時煮的意大利粉都不錯。
下月翠如將前往巴黎採訪奧運，此行主要負責採訪周邊的事物。提到巴黎即將迎來一股超級熱浪，問到翠如會否帶定啲小背心或比堅尼過去？她即說：「都唔係我着啦。」阿蕭就勸翠如：「唔好呀，唔好呀！」翠如又稱以前拍旅遊節目去過好多好熱嘅地方，都有概念。問到阿蕭會否去巴黎探班？他說：「都想去探班，但7月我要喺佛山拍《巨塔之后》，9月還要遠赴布拉格。」問到會否擔心太太？他反而羨慕多過擔心：「4年一次，聽聞啲入場券炒到好貴。」
近日正在佛山拍攝劇集《巨塔之后》的煒哥，特別回港錄影節目，她透露會同拍檔大廚煮有香港特色的食物，並會以元朗盆菜為藍本，加入法式食材，實行中西合璧，事前她也有跟大廚試煮了一次，煮完之後帶返屋企給老公試食，他都說好味。
煒哥又稱因為要照顧老公，每隔兩三天便返港一次，又透露老公連洗衣機都唔識用：「佢唔識開洗衣機，曬衫又好麻煩，所以我好重要。（老公生活上唔係好識照顧自己？）喺其他方面有佢嘅技能，拍拖嘅時候都已經知道，大家好了解，呢方面我亦好願意付出。」
提到《巨》劇開拍前臨時易角，由張可頤變成宣萱，煒哥對張可頤未能演出亦感可惜，但跟宣萱合作都超開心：「我哋好多嘢傾，關於健康、寵物、同護膚心得，有相逢恨晚嘅感覺。」
陳煒梁競徽談父母哽咽
另外，昨晚播出的一集《拍檔廚房》為「主題故事Omakase」，煒哥和梁競徽分別夥拍餐廳行政總廚譚以健（Ken）和酒店行政總廚邵德龍比拚。
煒哥首談與亡母曾因花膠海參吵大鑊，更激動到落淚。事緣陳母多年前患病期間，煒哥不時煲花膠及海參給母親補身，有次母親得知女兒所買的食材如此昂貴後竟和女兒吵起來，陳母當時更激動至流下眼淚，陳煒憶述：「相信佢係覺得個病拖累咗我，所以唔開心流眼淚。嗰時同佢嘈咗兩句我返咗房，過咗十零分鐘，突然聽到『嘭』一聲好大聲，好似有嘢跌落樓嘅聲！我嗰刻好驚，個心跳咗出嚟，好慌咁即刻衝出廳，好彩我媽媽仲坐喺度睇緊電視。嗰刻我終於知道自己錯，可能我覺得好嘅嘢，唔代表喺媽媽立場係一件好事。」煒哥眼紅紅表示從沒跟人提過此事，如今說出來後反而感到釋懷：「希望媽媽在天會接受我嘅道歉。」
梁競徽稱到內地工作後，才意識到父母年紀真的不小了，他一度哽咽地說：「唔珍惜嘅話好多嘢都會錯過。爸爸媽媽都好鍾意食魚，但佢哋唔係好識噒骨，加上年紀又大，怕咗唔敢食。邵師傅就諗咗呢個拆骨魚頭煎蛋，等佢哋可以好放心咁去食魚。」
