聞翠如帶比堅尼 蕭正楠嗌唔好
天氣預測巴黎奧運熱浪逼人
四年一度的奧運將於下月底在巴黎舉行，黃翠如有幸到當地採訪見證盛事。有天氣預測歐美正受熱浪侵襲，巴黎或成史上「最熱奧運會」，翠如表示不擔心，會帶防曬用品及盡量少郁動「抗熱」。記者提議她帶小背心或比堅尼到當地，其老公蕭正楠聞言即大反應說：「唔好呀！」
譚俊彥、蕭正楠、陳煒、龔嘉欣及張曦雯（Kelly）等，昨日到電視城為方力申與黃翠如主持的煮食節目《拍檔廚房》延續篇《拍檔食堂》錄影。翠如透露下月將到巴黎採訪奧運，主要負責採訪周邊事物：「聽聞當地好多餐廳同店舖，因擔心應付唔到太多顧客，研究緊會唔會閂門唔做生意，我都擔心拍唔到主題餐廳同奧運氣氛。」聽到老婆翠如可能無啖好食，阿蕭笑言：「我煮定啲嘢畀你帶過去，食壞肚好過冇得食。」
提到天氣預測巴黎即將迎來一股超級熱浪，問翠如會否帶小背心或比堅尼？她笑言：「都唔係我着啦！」阿蕭亦說：「唔好呀！」翠如稱以前去過南美洲拍旅遊節目：「當時都講緊30幾40度，都有概念，到時唯有唔好郁動太多，同埋帶防曬用品。」問阿蕭會否去巴黎探班？他說：「都想去探班，但7月我要喺佛山拍《巨塔之后》，9月又要去布拉格。」問到會否擔心太太？他坦言羨慕多過擔心：「4年一次，聽聞啲入場券炒到好貴。」然後向翠如說：「我淨係想要C朗簽名球衣，對你有信心，有機會嘅。」翠如則指以前採訪世界盃時，都有幫老公搵明星球衣：「發覺真係好貴！」
陳煒與宣萱相逢恨晚
近日忙於在佛山拍《巨塔之后》的煒哥，特別回港錄影節目，提到《巨》劇開拍前臨時易角，由張可頤變成宣萱，煒哥表示未能跟張可頤合作感可惜，但能跟宣萱演戲都好開心：「我哋好多嘢傾，關於健康、寵物同護膚心得，有相逢恨晚嘅感覺。」
早前Kelly與男友在中環拖手行街被偷拍，事後在網上瘋傳，Kelly大方說：「其實嗰日係生日，當時就係行緊去食飯，男友都見到有人影相，當係生日留個紀念，我哋從來冇避忌。」問到可有結婚計劃？她坦言：「男友想啲，我冇乜諗呢樣嘢。（有咗BB先結婚？）我連結婚都唔想，點會想生BB？遲啲先算，不過有都係一種祝福。」
