MV拍到「精神分裂」 許靖韻望新歌可療癒
香港文匯報訊（記者 子棠）許靖韻（Angela）的新歌MV《被吃掉的靈魂》已告面世，她笑言拍MV時有精神分裂的感覺，因鏡頭前很傷感，鏡頭外就好歡樂。
Angela的新歌歌名被指與其2017年的作品《被討厭的勇氣》十分相似，她稱其實是沒有關連，「《被討厭的勇氣》係喺我出道第四五年，一個成長嘅階段，填詞人用呢一首歌非常之正面去鼓勵我；今年佢就畀咗我呢一首超級負面嘅歌，可能覺得我開始可以handle負面情緒，但我覺得其實兩首歌係一個天、一個地，極大contrast，但可能又有啲關連，因為好好活着都係一個最大嘅勇氣。消化《被吃掉的靈魂》歌詞後，能體會到有時候我哋會將『攰到想死』掛喺嘴邊，但唔會真係畀自己死，我覺得有啲反映咗喺歌詞裏面。」
雖然她一直予人感覺開朗正面，但她形容自己是一個極端的人，情緒可以由零跳到一百，「平時可以好開心，但唔開心時我係爆發式咁喊。試過喊足一日，頭痛到食止痛藥先瞓到覺。錄音時，我回想崩潰的經歷，將情緒注入旋律，並希望將新歌送給處於低谷中的人，如果有人處於絕望，希望從呢首歌可以得到治癒。」
Angela拍攝MV的第一場戲印象最深刻，「其實首歌係好emo，拍第一場海邊景時個天落毛毛雨，好襯首歌，拍攝時我嘅情緒應該係唔開心和比較負能量，但當時好多學生同埋有其他人喺側邊游緊水，現場環境好歡樂，所以我覺得同我形成咗一個好大contrast。」
