順德騷歌迷嗌「除衫」 林曉峰獲爸爸捧場勁緊張
香港文匯報訊（記者 阿祖）為實踐歌手夢，林曉峰（阿Lo）入行30年，今年正式以歌手身份出歌，早前推出兩首以他本人的故事為藍本的歌曲《曾經被遺忘的人》和《四季人生》，最近更譜上廣東話歌詞，分別為《自補人生》和《第一個春天》 ，並於上周末（15日）「想你的FENG吹到了順德站」個人音樂會上首次演唱。
音樂會開場前歌迷大叫「林曉峰開工啦」催促出場，除了阿Lo名字，更有歌迷高舉「除衫」和「娶我」的燈牌，非常搞笑。阿Lo穿着白色西裝出場，以新歌《自補人生》揭開序幕，阿Lo又在台上分享由演員到歌手的心路歷程，亦在台上看屏幕上歌迷在網上的打氣留言，有感性的，亦有搞笑的。之後他唱《一起衝一起闖》，台下歌迷預先將心願和祝福寫在紙飛機上，齊齊「飛」上舞台，由阿Lo親自讀出和回應。
騷後阿Lo表示又開心又感動，他說：「好開心，今次Fans熱烈反應，比廣州站不遑多讓，見到台下好多情侶、父母帶埋小朋友，見小朋友睇得好興奮。最估唔到台下好多男觀眾，跟着唱足全場，甚至有啲唱到想喊，所以我覺得好開心。」他又笑指在最前排的一班忠粉唱錯歌詞，連他都一齊跟着唱錯。
有歌迷要求「除衫」，阿Lo笑說：「佢哋為我好，叫我除衫就係要我保持健康好身材。」而林爸爸和家姐兼經理人林珊珊也到順德來捧場，風趣的林爸爸即場教阿Lo講上海話：「好開心老竇睇我今晚演出，佢好鍾意唱歌亦唱得好好，我細個被佢影響好深，佢要求好高，所以我好緊張。」
