特色單位唔可以平賣
湯文亮博士 紀惠集團行政總裁
上星期六出席電台節目，主持人話中國恒大（3333）前CEO賣走的特色單位要輸五成，點解特色單位咁貴，如果唔係咁貴，就唔會輸咁多，其他單位只是輸兩成。
一齊做節目的還有會德豐黃光耀，黃老闆當然唔方便回答，我唯有做爛頭蟀，原因很簡單，特色單位賣得貴，令到買其他單位的人覺得抵，究竟貴幾多，一般來說都有五成以上，如果有人買了那個特色單位，買了普通單位的當晚就會開香檳，至於點解可以賣得咁貴，一個rare字，罕有就可以賣得貴，所以，特色單位絕對不能平賣，否則就會影響全屋苑樓價。
網上最冇吉士唔開名
講開又講，有朝早開例會，有同事話在網絡上有網民引用某些名人說話，認為香港樓市將會大冧，叫我們小心一些。老實說，唔叫我們都小心，如果唔小心，現在俾銀行call loan call到失魂，不過，在網絡上最冇吉士的人就是自己唔敢開名，但經常引用其他知名人士說法，唔開名係冇問題，但千祈唔好引用其他知名人士說法，尤其是一些批評別人的說話，對那位知名人士以及被批評的人都不公平。
同事仲話，那些唔敢開名的人很矛盾，又希望別人關注，又唔想別人知道他的名字背景，所以，就話某些批評是知名人士所講，加強他的說話真實性，而事實上那位知名人士從冇講過。
