孫漢霖絕緣文凱婷
自認情場初哥
無綫選秀節目《聲夢傳奇》出身的孫漢霖（火雞），早前推出個人第2支單曲，入行後曾與「聲夢小花」之一的文凱婷（Aeren）傳緋聞，然而雙方皆矢口否認。對於感情問題，火雞強調與Aeren僅屬朋友：「我哋認識咗好耐，冇『撻着』嘅掣。」不過，火雞聲言搵伴侶偏愛日久生情，未知與Aeren日後可會墮入愛河。
採訪、攝影：子棠
近日火雞推出新歌《Over You》，更轉型節奏感較重及輕快的City Pop曲風，帶點上世紀80年代Disco元素。現年25歲的火雞年紀輕輕，雖然從未親身感受過Disco年代，但總嘗過失戀滋味。火雞自言感情方面比較「乾淨」，多年來只拍過兩次拖經歷不多。他說：「處理情傷嘅方法係盡量令自己做嘢好忙，忘記一切。」火雞自揭初戀發生在19歲，當時卻不懂拍拖：「好多嘢唔識處理，就好似計時炸彈咁有事發生就講分手，結果真係分手，但初戀始終深刻，適逢當時學緊唱歌，就用心去學及鑽研，慢慢就忘記。」至於第2段感情，火雞慨嘆是相隔幾年後發生，最終要找朋友訴苦治情傷。
搵女友偏向日久生情
至於與23歲的緋聞女友文凱婷經常以「情侶檔」拍片及唱歌，二人除了翻唱戴祖儀與涂毓麟的合唱歌《我們再不講再見》，亦傳了緋聞多年，是外界公認的一對。火雞笑謂：「佢只係一個『幻覺』，我已經澄清咗好多次，外間仍然好喜歡將我哋拉埋一齊，可能我哋之間有化學作用，所以經常會一齊拍片！」火雞強調二人沒有擦出愛火花：「大家都冇嗰種感覺，因為比賽至今已認識咗好耐，有朋友基礎，所以冇『撻着』嘅掣。」談到感情狀況，火雞現時仍是孤家寡人，但他似乎暗示與拍檔有機會日久生情，言語間非常矛盾。他說：「我偏向日久生情多於一見鍾情，因為發現一見鍾情會有一個限期，過咗依個限期就會慢慢變淡；反之日久生情早已建基於友情，熟悉彼此的價值觀同興趣。」
為新曲MV闖紅燈區
談到新歌《Over You》，火雞獲MV導演穿針引線下在台北取景，更找來寶島的新生代女演員、曾拍攝台劇《此時此刻》的宸頤擔任女主角，火雞在兩日一夜的拍攝過程中遇到不少難忘事，包括導演請朋友借出舞廳取景。火雞這位小伙子為MV首度踏足紅燈區，更有幸攬攬女主角，認真幸福。他自爆最初緊張得未埋位心臟已呯呯跳，幸好女主角相當專業助他入戲，最終拍攝順利完成。至於拍親暱鏡頭寧選擇熟悉還是陌生對手，火雞直言：「我寧願選本身唔識嘅人，好似我同文凱婷，因為係熟悉嘅人會好尷尬，事關拍完之後仲會見面。」笑問火雞拍攬攬戲也拒絕文凱婷可怕令對方難受，他哈哈大笑道：「唔會呀，佢依家好幸福快樂。」
冀做反派自稱惡得起
火雞入行3年多，認同自己在某方面很矛盾。曾拍劇集《青春本我》及《回歸》的他指當然希望有歌手以外的發展，亦想有機會多拍戲。他說：「我鍾意警匪片，自覺外形適合做反派，希望有機會演出與警察對峙嘅警匪片，不過可能自己一講對白就破功！」火雞自言其說話方式、聲音較乖和慢，但相信也有能力惡起來。提到其外形對比聲線十分矛盾，他不得不承認其人設充滿矛盾之餘，更不忘自我硬銷，指自己在演藝事業上其實也有無限可能性。
