與鄭子誠演父子 林家謙想唱兒歌
香港文匯報訊（記者 阿祖）林家謙日前出席昂坪360多啦A夢展覽活動，自爆是這套動畫的粉絲，除出席活動外，他更被邀請拍攝廣告，穿上黃色經典上衣重現「大雄」造型，與鄭子誠飾演父子：「這條片又不是扮大雄的，是講我和鄭子誠前輩的父子情，整個感覺都好溫馨，今次是我們第一次合作，感受到對方的專業，學吓什麼叫做演技。」
林家謙從小就是卡通迷，在屋企經常唱兒歌：「入行後其實我未試過唱兒歌，睇怕都未必有這個Market，我都無Tyson Yoshi咁受學生歡迎，不過如果邊個咁大膽搵我都想試吓。另外我都想試吓做電影配音，但不知可以聲演什麼角色，超級英雄就肯定無我份，我把聲都不夠霸氣。」林家謙還笑言自己是金魚記憶，需要「記憶麵包」，希望靠法寶記歌詞，並說：「其實我同胖虎都有些相似之處，就是大家都好鍾意唱歌，細個時候成日被人彈唱歌不好聽，當時我都好想好似多啦A夢般受歡迎。」
而鄭子誠就大讚林家謙專業，自己都是對方歌迷：「他唱歌點會似胖虎呀？我都好欣賞他的歌，他是個好有才華和個人風格的唱作歌手，今次拍攝我話畀人知會與他合作，不知有幾多姨姨羨慕，仲話想跟埋來見他，你就知他幾受歡迎！」
