古仔零歌癮 「封印」拜神舞
《九龍城寨之圍城》票房破億
古天樂前晚率領電影《九龍城寨之圍城》演員進行謝票，對於電影票房破億，古仔表示非常振奮。談到日本女團Avantgardey將於下月開騷，希望邀他上台一齊跳《今期流行》的「拜神舞」，古仔聞言後耍手擰頭，更稱沒有歌癮，不會開金口再唱歌。
由5月1日正式上映至昨日，連續41日成為香港單日票房冠軍電影的《九龍城寨之圍城》，昨日港澳總票房正式衝破1億港元。前晚古天樂、林峯、劉俊謙、胡子彤、張文傑、伍允龍等到九展為《九龍城寨之圍城》進行謝票，吸引大批粉絲支持。大會安排古仔簽署畢業獎狀，頒發予「城寨4子」林峯、劉俊謙、胡子彤及張文傑。
問到可有信心超越累計票房榜首的《毒舌大狀》？古仔說：「希望觀眾繼續支持，令票房再創高峰，成為華語電影累計票房史上第一位。」談到日本女團Avantgardey日前來港出席活動，大跳古仔的經典歌《今期流行》「拜神舞」，更希望7月來港開騷時與他一齊跳，古仔耍手擰頭說：「夠啦，佢哋跳就算。嗰日有朋友Send條片畀我睇，仲以為係整蠱我！完全冇諗過首歌過咗咁多年會翻Hit。（會受邀？）邀請我會去睇，但唔會上台一齊跳。（唱歌呢？）唔好搞啦，我依家連去唱卡拉OK都唔唱歌，冇歌癮。」
伍允龍感覺似拍《流星花園》
對於電影票房成績理想兼贏盡口碑，伍允龍說：「小弟拍開功夫片，係一個功夫佬，但依家感覺好似拍咗《流星花園》咁，感謝觀眾嘅愛戴，享受緊依家嘅感覺。」林峯說：「成部戲觀眾喜歡每一個角色，我哋每一位演員都付出努力，我真係覺得好感動，希望可以再接再厲，喺下輯畀多啲驚喜觀眾。」胡子彤說：「有趣係佢哋（粉絲）會搵番我哋以前嘅資料，唔會淨係鍾意依家嘅我哋。」問到怕不怕被人翻炒他與歐鎧淳昔日的一段情？胡子彤說：「只不過係人生其中一個片段，完全唔係黑歷史。」
談到成為「破億男星」，伍允龍表示電影屬於一眾演員，並感謝觀眾支持：「香港歷史上有一部咁突破嘅電影，自己有份參與好開心！（有冇機會開《王九傳》？）呢啲等電影公司決定，今次有份參與呢部電影已經好開心，做一次王九已經好開心，睇吓下一步戲佢哋會唔會搵我做另一個角色。」
