After Class三小花 7月合體開騷
鍾柔美盼做郭富城個唱嘉賓
女團After Class三名成員鍾柔美（Yumi）、詹天文（Windy）與姚焯菲（Chantel）將於下月合體舉辦演唱會，Windy表示個唱以開心為主題，希望粉絲全晚「站起來」一齊跳唱，度過一個愉快的晚上。至於視舞台王者郭富城為偶像的Yumi，很想做對方的演唱會嘉賓。
「聲夢小花」Yumi和Windy日前一齊出席活動，二人表示將於7月聯同好姊妹Chantel合辦演唱會，近日已拍攝演唱會海報，亦已開會商討流程及定下主題，現正選曲目。Windy透露：「快歌勁舞一定唔少得，要大家全晚Stand Up，仲會唱多啲開心嘅歌，營造快樂嘅氣氛，令大家一齊開心同享受。」Yumi則笑言：「今次演唱會賣點係放緊暑假，當然要睇3個聲夢小花，仲會有一啲我哋冇表演過嘅演出，畀一直陪伴我哋嘅粉絲睇到我哋嘅成長，總之一定會有驚喜，但就唔可以再透露太多，敬請大家期待。」
Yumi開心被偶像認得
提到Yumi在《聲夢傳奇》比賽中跳唱郭富城的《狂野之城》大獲好評，早前她在節目中亦再度表演這首歌，明顯相當喜歡。問到會否列入演唱會的歌單之中？她興奮說：「我之前去澳門睇咗前輩（城城）嘅演唱會，好開心佢認得我，仲同我點頭，令我緊張到唔知點樣！亦感覺好神奇，原來佢真係有睇我嘅《狂野之城》跳舞比賽片段。」
談到城城將在紅館開騷，Yumi自爆超級崇拜對方，經常夢想能與這位舞台王者一起登上紅館舞台，她很希望可以有幸做城城的個唱嘉賓，亦為此一直努力裝備自己。
