古天樂雨中一打七似泥漿摔角
古天樂、任達華、謝君豪與盧慧敏等昨日出席電影《偵戰》拜神儀式，古仔表示角色似福爾摩斯，利用高科技查案，亦有不少動作場面，最辛苦是要在雨中拍攝：「劇情講幾個鐘頭入面發生嘅事，落好大雨、行雷閃電，我喺出面都淋咗幾晚雨。雖然依家夏天，但夜晚拍都幾凍，有一場同6、7個黑衣人打，好似泥漿摔角咁。」提到《九龍城寨之圍城》票房超越他監製的另一套電影《明日戰記》，古仔笑言：「自己打贏自己仲想點呀？哈哈！都算係咁啦，部戲咁好成績好開心，最緊要做啲好嘅港產片。（有信心成為香港華語電影最高票房？）盡力啦！仲有啲謝票宣傳，希望觀眾繼續支持。」
謝君豪則指自己的角色神秘：「夏天要着大褸同戴手套，哈哈！」問到大熱天時穿大褸可擔心中暑？他笑言沒法子，但十分欣賞自己的造型。
