男神踩過界 進軍餐飲拓財路
正所謂花無百日紅，不少男星除了發展演藝事業，也會創業搞生意拓財路。多位無綫小生如羅天宇、黎諾懿、陳豪及黃宗澤等先後涉足飲食業。去年初天宇小試牛刀，聯同張景淳、李興華闖深圳賣港式小食變「雞蛋仔王子」；另一邊廂，陳豪旗下咖啡店近日也在中環街巿「插旗」；至於在港投資30多間餐廳的黎諾懿盼望多些其他地區具消費力的遊客訪港：「我哋餐廳有唔同地方食材、廚師，做到物超所值！」
文：龍獅
黎諾懿 靚食材抗北上風潮
除了身兼演員、主持及監製 ，黎諾懿也是知名餐飲集團Gaia Group的創意大使，旗下有30多間餐廳在港營運，包括西餐廳KEW+、浪居酒屋及劉一手重慶火鍋等。諗頭多多的諾懿當然也絞盡腦汁谷生意，對於近日內地開放多8個城巿赴港個人遊，諾懿受訪時稱：「我都希望有幫助，除咗遊客，巿民疫情後習慣早返屋企，街道、商場夜晚八點幾已經冇乜人，希望大家可以玩夜啲振興本地消費，我哋有啲餐廳好似火鍋店都延長營業時間至零晨12點！」諾懿深明難抗巿民北上消費風潮，但也有對策：「我哋以質素取勝，餐廳有唔同地方食材同廚師，希望食客感受到出品有特色又物超所值。（盼政府開放更多一線城巿個人遊旅客？）絕對歡迎，仲希望開發多啲地區遊客，好似中東及東南亞國家越南、泰國，對本地巿況有幫助。（今年集團繼續擴充？）租金同之前差唔多，加上人工貴，除咗基本支出其他都要慳，依家又興快餐文化，我哋會繼續喺商場或foodcourt開店，大嗰啲就睇定啲，無話刻意要開幾多間，最緊要巿況好轉！」
羅天宇 挾雞蛋仔征服深圳
去年初，三位藝人羅天宇、張景淳及李興華膽粗粗在深圳開港式小食店「噢萊客」，主打賣雞蛋仔、咖喱魚蛋，其後愈搞愈旺，轉眼間三人在深圳寶安開第八間分店，北上賺到第一桶金。天宇受訪時稱：「我同張景淳假期上去，另一股東李興華同內地拍檔就負責日常營運及擴充，內地潮流轉得快，除咗深圳，傾緊其他大灣區城巿開店，當然希望愈做愈大。」獲封「雞蛋仔王子」的天宇主力嚴控食物品質及宣傳，開業至今每份16元人民幣的原味雞蛋仔最暢銷：「內地人口味同香港有別，小朋友、老人家都鍾意我哋嘅雞蛋仔，盡量調校味道唔太甜！」天宇透露生意漸上軌道，現時在深圳僱用數十員工，希望吸引更多投資者合作開聯營店：「深圳有啲便利店已經可以買噢萊客嘅雞蛋仔，相信有質素嘅小食有巿場，最希望將港味帶到大灣區！」至於可有計劃反攻香港，他強調在港開舖有較多考量：「包括舖租、請人，同埋雞蛋仔唔可以定價太高。」
黃宗澤 尖沙咀蠔吧引追星族
一向是烹飪高手的黃宗澤（Bosco），2013年在九龍城開設蠔吧OysterMine，其後將原舖搬至尖沙咀，新冠肺炎疫情期間停業曾損失過百萬，他亦堅拒裁員及減薪，最終成功捱過疫情。Bosco事事親力親為，經常現身巡舖及招呼客人，OysterMine現已成小紅書打卡熱點，近期更獲不少藝人捧場，包括Tyson Yoshi（程浚彥）、電影《周處除三害》的台灣演員陳以文等，各位去嘆生蠔分分鐘也可成功追星。
陳豪 中環開咖啡店撐香港
早年創立自家咖啡店品牌Blooms Coffee，先後進駐尖沙咀、觀塘的大商場，雖然本地飲食巿道面對極大挑戰，阿Mo亦勇者無懼，本月初在中環街巿開設Blooms第六間店，又親身到店舖打卡做生招牌，更有網民野生捕獲無綫總經理曾志偉到訪嘆咖啡。阿Mo受訪時稱：「中環街市自從翻新以嚟，一直都係充滿住香港特色嘅地方，我喺依度開咖啡店，實在非常適合！自己都希望藉住呢個地方去幫手推廣一下我哋香港本土餐飲業！」
