優先選購容易做炮灰
湯文亮博士 紀惠集團行政總裁
我見到有名品牌邀請信畀老婆，可以在名牌貨品公開發售之前優先選購，我老婆順手將邀請信掉咗佢，我唔係幾明，優先選購一定有着數，唔買都去睇吓。老婆話試過幾次同一大班大媽去睇吓，結果大家都買了不少，優先選購之後就公開發售，名牌公司很多時都會在公開發售時打折，令到優先選購的買家還未有機會使用，就已經唔見一大筆錢，現在大家對優先選購提唔起興趣，所以掉了那封邀請信。
近日有不少新樓盤買家撻訂，他們大多數是首次置業者，在政府辣招之下，他們變成優先選購者，以為在沒有競爭對手之下，自己是大贏家，其實，沒有競爭對手即是沒有購買力，樓價又點會升，政府害死他們，好彩政府及時撤辣，否則那些首次置業者輸得仲多，不過，現在都輸唔少，有不少當時買入的單位已經變成負資產，真係喊都無謂。
我問過那些當時買樓的人，點解明知道辣招鎖死購買力，結果樓價必然下跌，咁嘅情況都買樓，似乎相當不智，最好做法就是學大媽將那些優先選購邀請信掉咗佢，政府唔撤辣就唔會買樓，他們話做唔到，因為當時見到有不少人願意付15至30%特別印花稅買樓，自己有如此特權，唔買就笨。
名牌優先選購收附加費
答案令我想起名牌公司可以效法政府，就算冇邀請信都可以優先選購，不過要畀30%附加費，如果有人願意付附加費買名牌，我唔信那班揸住邀請信的大媽唔買，更加唔會掉咗封邀請信。
