鄭秀文揪出「心魔」 震到毛管戙
泰國頂尖團隊助陣拍MV
將於七月在紅館舉行一連十三場演唱會的天后鄭秀文（Sammi）日前推出新歌《心魔》，MV昨日正式上架。她專程飛到泰國拍MV，整個拍攝團隊及舞者都是泰國最頂尖陣容。她坦言與40位舞者一齊演出時心情激動，勾起她埋藏深處的情緒，某些場面更拍到毛管戙，覺得很震撼！
鄭秀文透露《心魔》MV拍攝手法破格，充滿電影感，是她入行以來從未試過。由於泰國之行行程緊密，黃昏抵達當地後，她即到酒店試造型，翌日早上9時便埋位拍攝。當日氣溫高達36度，Sammi一直在戶外拍攝，凌晨1時才收工。為了在演唱會保持最佳狀態，Sammi未有機會品嘗當地美食，但她覺得一切辛苦都是值得。
花45分鐘「紋身」
她說：「其實好多唯美嘅畫面，亦有勾畫心魔嘅意境、意象，呢啲意象都係用人嚟堆砌。我哋搵咗40位Dancers拍，即使係一個好簡單嘅動作，人多動作又齊整嘅時候，就有一種好強大嘅震動感覺。」Sammi於MV中有多個獨特造型，其中一件大褸因重量十足，令她舉步難行，其身上的紋身貼紙亦要花近45分鐘貼上，每一個造型、細節都非常用心。
能夠順利完成《心魔》MV，Sammi非常感謝唱片公司支持，她說：「整個MV嘅籌備過程，我交晒畀經理人處理，要多謝唱片公司支持我，咁大個團隊喺泰國拍攝。至於我嘅準備係諗到歌曲混音部分，點樣做先可以將歌曲嘅意境提升？點樣將歌詞同音樂嘅靈魂完全呈現？仲有造型都好多同特別。去到現場，最震撼係舞蹈，甚至對嘴唱歌，有好多連我都意想不到，勾起我好深、好Deep嘅情緒走出嚟，令到畫面好強烈，因為嗰刻情感係真實，Dancers亦都係帶住豐富情緒演繹，某啲場面有啲毛管戙，一切都來自真摯嘅情緒。」
