憶愛犬離世 林夏薇淚崩
盼與陳展鵬後會有「奇」
已播畢的無綫劇《逆天奇案2》收視理想，台前幕後前晚再次慶功！身為女主角的林夏薇本應「飲得杯落」，但她神情有異，原來其愛犬日前不幸離世！她越說越傷心，期間更淚如雨下，我見猶憐！
林夏薇（薇薇）、劉佩玥（Moon）、馮盈盈等前晚出席無綫劇《逆天奇案2》慶功宴，緋聞男女張子丰和王菲大方合照，男主角陳展鵬因工作未能現身。盈盈於《逆天2》改邪歸正，她表示要多謝編劇，讓她由妖精變未婚妻。正在修讀碩士的盈盈表示下月行畢業禮，會繼續進修網上課程。問到可會讀博士學位？她笑言有想過，但要有教授收自己。問到可想拍第3輯？薇薇希望將退休的監製劉家豪重新考慮，讓她與展鵬「再續情緣」。
薇薇於活動上強顏歡笑，原來她剛收養的小狗不幸離開，她哭着說小狗只有3個月大，之前見過幾次面：「佢走得好突然！（咩病？）醫生話佢有隱性疾病，母親節我帶佢返嚟，好似代表母親節嘅我愛你，但『520』就火化，我帶咗佢返屋企下葬喺棵樹下面。唔好意思，本來唔想嚟，怕影響情緒，但劇集有好收視，都想嚟支持。」
劉佩玥最驚失禮容祖兒
Moon早前於晚宴上唱容祖兒（Joey）名曲《逃避你》，獲網民讚唱功不輸天后，Moon謙稱：「千祈唔好咁講！我見呢啲評語我都好驚，我係超級鍾意Joey，係佢Fans，由佢《未知》隻碟開始鍾意佢，千祈唔好講我媲美佢，我連佢一成唱功都冇。我入咗行都見過Joey，佢知我個名好開心。我知大家錫我，我係鍾意唱歌，但唔係唱得特別好，我唔可以同佢相提並論。（有冇失禮Joey？）我希望每一次無論唱任何歌手嘅歌，我都唔好失禮原唱者，特別係Joey。」
問到可會參加《中年好聲音》圓歌手夢？Moon坦言未夠資格做專業歌手：「俾人讚當然開心，但就算話我唱得難聽，我都冇嘢，因為呢個係我鍾意做嘅嘢。但如果做專業歌手，外間就會用另一個Level去評價我。」
