告別9年紅軍生涯 高普：你哋要晒冷支持史諾
正所謂天下無不散之筵席，在利物浦執教了九季的德國名帥高普，昨晨終迎來其「紅軍」領隊生涯的最後一戰，最終領軍在晏菲路主場以2:0輕取狼隊。由於已鐵定拿下季軍，昨仗就似是一個歡送高普大會，這位56歲領隊向球迷致辭時氣氛感人，他更呼籲球迷來季迎接新領隊史諾到臨時，要像支持他一般力撐史諾。
由球員熱身開始，高普便步入球場中，向四方八面的球迷作道別，只見觀眾席上都有球迷砌出了高普名字「Jurgen」的字樣，當他回到後備席聽到球迷高唱著名的「你永遠不會獨行」，高普則不斷單手拍向心口作回應。賽後，高普再接受隊員列隊送別，他再向晏菲路的球迷作告別感言：「我真係嚇咗一跳，我以為自己會崩潰，但依家我好開心，真係估唔到。我為大家、呢度氣氛、場波，以至成為呢個大家庭一份子感到高興，真係冇得彈，多謝大家。」
高普離隊之後，將會由飛燕諾主帥史諾接手，高普也希望能完美交棒：「依家個感覺唔似係終結，反而似係新開始，因為我睇到呢隊波充滿天分、充滿年輕力量、創意及求勝慾，呢個係個發展階段。」發言期間，高普突然高唱：「史諾！啦啦啦啦！史諾！啦啦啦啦！當下季開始，大家會想睇吓發展成點，但唔好咁，你哋歡迎新領隊要好似歡迎我一樣，由第一日開始就『晒冷』支持！」
