寫德甲歷史 利華實現不敗封王
德甲上周末煞科，已經提前奪冠的利華古遜，最終在聯賽最後一戰主場以2:1小勝奧格斯堡，開創德甲歷史，成為首支以不敗姿態奪冠的球隊，並將歐洲最長不敗紀錄增加至51場。不過，被利華終止了聯賽11連霸走勢的老牌班霸拜仁慕尼黑，同晚卻在一度領先2:0下，反勝為敗以2:4不敵賀芬咸，就連聯賽亞軍亦失去，被史特加反超，認真羞家。
拜仁失落亞席，亦意味着下屆的德超盃資格亦失去，球員生涯一直與冠軍無緣的「無冕王」哈利卡尼似乎繼續黑仔，又會錯過一個捧盃機會。唯一慶幸，是昨仗因傷缺陣的他，最終仍以36個入球榮膺德甲神射手，算是取回一個安慰獎。
至於利華賽後，大軍上下都是瘋狂慶祝，主帥沙比阿朗素表示：「我哋班波寫入咗德甲歷史，或者當廿幾年後睇番，大家都會話『嘩，我哋咁勁喎！』我哋永遠唔會忘記今日，我為大家驕傲，亦要感謝球迷嘅支持。」利華本周仍有任務在身，包括周三深夜嘅歐霸盃決賽及周末嘅德國盃決賽，力爭實現三冠王美夢。
