煞科日專家 加柏強鋒大起史特加
德甲煞科日大盤盤口及賠率都開得極瘋狂，令大盤客難以落手。黑柴只選擇了史特加對慕遜加柏一戰，求穩推介賠率偏熱的[3.5]大盤。史特加目前居第3位，最後一戰當然不會放棄爭亞軍的理論上希望，即使無緣亞軍，經過一季神奇表現，陣中主力中堅華迪馬安頓、左閘米圖斯泰特、中場基斯富列治及前線安達夫，都在拿高士文的歐國盃德國隊大軍初選名單，今仗勢必盡踢身價波，務求給予拿帥上佳印象，為進入決選名單盡最後努力。加上頭號射手古拉斯仍在刷新史特加球會史上單季入球紀錄，主場謝幕當然數得就數！
慕遜加柏只排聯賽榜第13位，成績與近季一樣未能令人滿意。不過這支老牌球會卻有一個特別傳統：例必盡心盡力踢好煞科戰！該隊與柏林聯一樣，自2019/20球季起，已連續4季於煞科日贏波，總以最好結尾氹球迷，何況陣中25歲德國鋒將羅賓赫克近期成為風雲人物，踏入2024年至今17場聯賽已取得10個入球，當中5球在近4仗取得，今場即使作客亦不容低估，有條件與史特加合演入球騷。
