馬德鐘食齋 擊退脂肪肝
被批扮大牌 郭政鴻急解畫
馬德鐘、陳山聰、郭政鴻、張景淳等多位藝人昨日現身醫療中心開幕活動，陳山聰和郭政鴻即場表演敲鑼打鼓，更出動二人成立的獅隊為活動助興。剛與黎耀祥、羅嘉良及陳展鵬以四大視帝姿態和薛家燕登台返港的馬德鐘自爆曾患脂肪肝，之後改食素、勤運動，健康已無大礙，郭政鴻則為被指態度欠佳的批評解畫。
視帝馬德鐘以代言人身份出席活動，笑言現在有使命感要提醒大家多關注健康，定期做身體檢查。他坦言隨年齡增長，現時非常注重健康，會定期進行身體檢查，隨即自爆6年前因生活作息不規律，以及飲食不均衡而患有脂肪肝，之後他食素、勤做運動和定期做身體檢查，現已回復狀態。
馬德鐘透露日前跟薛家燕及三位視帝羅嘉良、陳展鵬、黎耀祥到新加坡登台，前日才回港。他跟薛家燕都是充滿正能量的人，故一起開騷很開心。他又透露與羅嘉良、陳展鵬和黎耀祥獲薛家燕賜名「新四大天王」：「希望呢個組合可以持續落去，做埋巡迴演出，同埋好開心見到老朋友。」他續稱剛在深圳拍完劇，問到是否想放假去旅行？他說：「我鍾意一邊工作一邊去旅行，寓工作於娛樂。」
做直播帶貨收入好
郭政鴻指獅隊今年踏入10周年，屆時會舉辦晚宴慶祝。他透露現時主力在內地做直播帶貨、商演和拍劇：「未開劇嘅時候我會做直播帶貨，因為拍劇好被動，同埋都想增加曝光率，而且依家做藝人唔同以前，唔可以淨係拍戲。（直播收入好？）梗係OK啦！同埋依家嘅公司，我可以自己畀意見，大家會傾同配合，相對嚟講滿足感同拍戲唔同。」
提到郭政鴻早前在內地登台，因落車至行去布景板簽名的過程都笑容欠奉，又沒有揮手和市民打招呼，被網民指扮大牌！他解釋：「因為一落車我就要行去對面，嗰度好黑，我要好專注咁行嗰條路，如果唔係我會跌低，所以我一定唔可以邊行邊打招呼。其實我去到都俾個地燈『Kick』到，所以有時啲嘢睇咗一部分，就睇唔到另一部分。（覺得委屈？）我覺得係笑話一宗，你留意吓其他藝人，佢哋一落車都冇打招呼。」
