小方盈盈甜言甜品謝母愛 劉佩玥要將媽咪寵成女王
香港文匯報訊（記者 子棠、達里、梁靜儀）今天母親節，每年這些日子仔女都一定會為母親節禮物絞盡腦汁，但劉佩玥今年就準備叫媽咪自己決定要什麼，因為世上媽咪總是把孩子當公主般寵着，母親節她想回報給母親，把她當作女王般疼愛；而馮盈盈就親自整甜品、送花向媽媽表達感激愛意；孝順仔方力申口甜甜稱用餘生疼愛媽媽。
劉佩玥與母親的關係如知己，有時間大家會互訴心事，但能與母親成朋友，並不是人人都能做得到，劉佩玥坦言她也經過一段日子去經營提升母女關係才走到今天，每段關係的磨合，都是人生的功課，而她目前都在不斷經營中，算是經營得不錯，很有成績。談到慶祝母親節，劉佩玥說，「這些年從未問過母親真正喜歡如何度過這一天，都是自己與胞弟去猜想媽咪喜歡什麼，然後安排帶她去什麼地方吃飯，所以今年她決定把這個主導權交回母親手中，已經問定媽咪，叫佢自己諗下，最想要什麼禮物，最想點慶祝，去邊食飯，去邊玩，甚至佢話想去主題公園我哋都奉陪。呢一日佢係女王，佢想要咩，我哋安排。」
劉珮玥表示，多年來姊弟亂估母親節禮物，也不是沒有估中過，試過買了一件很漂亮的睡衣，媽咪收到後非常開心，可是劉珮玥希望家人能直說心中意願：「咁年年估係冇意思，家庭關係我覺得唔係用靠估來經營，所以今年我就叫媽咪坦白講，佢係一個知足常樂的人，可能佢會話簡簡單單，見到我同細佬、爸爸，一家四口喺屋企食餐飯就得，咁我哋一樣會成全佢呢個平凡的願望，但我同細佬就會再諗少少驚喜加喺後面囉。就等佢諗下都好。哈哈！」
因選港姐與媽咪關係解鎖
講到與媽咪的關係，劉佩玥謂早已變成如知己般的母女，這個昇華對於她來說，是非常珍貴，「其實許多家長都習慣收埋自己的內心感受，好多嘢唔會開口同仔女講，怕仔女擔心，但係我覺得咁樣係唔健康，你同最親的人都不分享心事，那可以跟誰分享？我媽朋友不多，少去行街，湊大我哋兩個，佢生活圈子中心就係仔女，佢為我哋付出咁多，我做仔女的也應該要學會點樣畀些愛佢。最初佢都唔係一開始就識同我打開心扉，係選港姐嗰陣開始，我有好多嘢唔識，唔知點做，我主動同佢分享求救，雖然媽咪都選過港姐，但係我嘅問題，佢未必解決到，佢好耐心聽我講完，我才發現就算佢幫唔到我，但係我同佢講咗之後，個心都舒服晒，開心好多，從此我領悟到，我慢慢自己先分享自己的事，再慢慢令佢再打開自己，分享佢的心事畀我。解鎖這個關係之後，兩母女就更親密。我印象最深刻的是，有一次媽咪同我講『我都係第一次做人媽咪，我都唔識㗎，我都係每日學習中』，呢句說話對我嚟講非常震撼，係喎，佢做過人仔女，但係佢都係第一次做媽咪，因為呢句話，好多時我哋有咩諗法不同而拗撬，我都會同自己講，先放下無謂的情緒，冷靜對事，和平討論。有一次媽咪仲同我講，好多謝我咁有耐心。每段關係如何經營都係我哋一生人嘅功課，我連最親的媽咪關係都搞唔好，其他關係都一樣會失敗，關係就係兩個人一齊互相體諒，互相包容，互相愛護對方。」
少時衝母發脾氣 小方用餘生彌補
出名是孝順仔的方力申，憶述與媽媽最難忘的一次經歷，是他13歲時在茶樓公然喝罵媽媽，他說：「細個我有哨牙，記得當時媽媽剛帶我去箍牙不久，她跟我說只要戴牙箍一個星期，我就信了她，結果牙箍一直刮損牙肉、又會牙痹，吃東西都有問題。結果就在茶樓飲茶時，我知道原來箍牙要箍兩年，就大發脾氣當眾鬧媽媽點解要呃我，媽媽都即場喊了出來。」問到事後如何修補與媽媽的關係，方力申說：「我當然知道自己做錯，當年箍牙都好貴，要兩萬多元，所以我用我的餘生去補救，會永遠疼愛媽媽。」
馮盈盈視母為平輩來相處
馮盈盈近年的母親節無論工作多忙碌，都會抽空與媽媽食飯慶祝母親節，同時會送上鮮花以表心意，今年都不例外，一家四口會留家中簡單慶祝。問到會否親自下廚慰勞媽媽？盈盈就笑說：「母親節當然唔會再勞煩媽媽辛苦下廚，當然係叫外賣，自己就會整低甜低卡嘅健康甜品。」她又祝媽咪身體健康，每日開開心心。
一向與媽咪關係好的盈盈，當年選美也是得到家人支持，盈盈指很多人都指她與媽咪外表似兩姐妹多過似兩母女，她亦很多謝媽媽將優良基因遺傳了給她。她指平日兩母女有不少共同嗜好，更會互相影響，她說：「例如我去跑步做運動操弗身體，之後媽咪都被我帶動到，想積極做運動，都有跟住我去跑步，不過有時她偷食雪糕、甜品，媽咪都會叫我唔好食咁多，影響上鏡，緊張過我。」盈盈又透露與媽媽相處之道，就是視媽媽為平輩：「我會當媽咪係同齡朋友，有時我哋傳短訊，媽咪啲用字都好簡短，講電話傾兩句就被佢cut線，身邊啲朋友都奇怪電話中嘅人係我媽咪？」她又指媽咪十分追上潮流，平日聽到她講一些潮語，立即要學，又會上網睇穿越愛情劇，並會留意「小鮮肉」，之前的《亞洲超星團》，媽咪都有留意。
