宣傳《神耆小子》 冼靖峰唔認炸子雞
LOONG 9上海舉行活動 香港成員冇份
LOONG 9成員冼靖峰（Archie）昨日為新劇宣傳，對於LOONG 9今日在上海舉行活動，但香港3位成員冇份，Archie坦言不知情，但沒有不快感覺，相信公司安排。問到會否向公司爭取到內地工作？他坦言有跟公司商量，希望做好表現令大家驚喜。
鄭則仕、傅嘉莉（Kelly）、LOONG 9成員冼靖峰（Archie）、羅毓儀（Yuki）昨日出席無綫劇集《神耆小子》宣傳活動，鄭則仕、Archie、羅毓儀、樊亦敏及莊思敏均於本月生日，獲公司送上蛋糕慶生。15日生日的Archie表示當日工作後會跟粉絲聚會，Yuki則稱23日牛一當天跟粉絲慶祝，願望是劇集收視長紅。Archie被鄭則仕形容為當紅炸子雞，他謙稱：「請食飯可以，我哋嚟緊都會一齊食飯慶祝生日。當紅炸子雞就唔好咁講，我係新人，喺唔同方面我都係初哥。」問到對自己演出有何評價？他稱每晚都坐定定睇電視：「我仲Set埋相機錄影，睇番自己嘅表現，其中第一集有三四個鏡頭覺得自己做得唔係咁好。」
提到LOONG 9今日在上海有活動，但只有S分隊的成員出席，香港3位成員均無份，Archie坦言不知情。問到有否不開心？他說：「都係粉絲問我會唔會去上海先知有活動，無論S隊或V隊，我覺得大家可以留意我哋唔同隊嘅Crossover，我只會因為表演得唔好而唔開心，唔會因為冇份參與而唔開心。（覺得香港成員被忽視？）公司有安排，我會把握好每個機會。（爭取去內地工作？）我哋幾個成員都有同公司傾過，想做好表現畀大家睇，令大家有驚喜。」至於早前LOONG 9香港見面會臨時取消，Archie透露6月將會補辦，時間地點則待公司公布。
傅嘉莉黑氣纏身
Kelly自爆最近黑氣纏身：「之前拍劇着咗對唔啱着嘅鞋，返到屋企發現兩隻腳趾公麻痹兼發黑，仲甩埋趾甲，依家要等啲甲生番出嚟，暫時唔可以着露趾鞋。」她續稱之前在港鐵站內踩屎：「有職員過嚟同我確認過係人嘅糞便，我當日仲要着住一對好鍾意嘅白波鞋，鞋底坑紋仲要好深，同我一齊行嘅朋友就完全冇事。朋友笑我應該去買六合彩碰運氣，但結果只中咗一個半號碼。」
