維拉勢頹 客場求勝難度「高」
歐協聯四強次回合今晚將演奧林比亞高斯主場迎戰阿士東維拉，首回合奧林比亞高斯作客大勝4:2，今場輸一球都可以晉級，形勢大好。維拉近況回落，上次主場都輸波，今場根本欠缺反勝本錢，更何況形勢焗攻會更加不利；今場維拉讓波，「讓球主客和」[+1]主勝要捧。（NOW 645台周五3:00am直播）
希臘勁旅奧林比亞高斯在上兩圈淘汰特拉維夫馬卡比及費倫巴治，都分別要戰至加時或互射12碼，因此在首回合賽前，都被全面看淡。不過，摩洛哥前鋒艾卡比在首回合卻踢出代表作連中三元，如今帶着兩球優勢在手，安心打反擊，加上主力後衛尼度爾及中場馬蘇拿斯都同時波監刑滿，今場可以復出，有望排出強陣出擊，以該隊在各項賽事近8場都能保持不敗下，加上有主場之利，今場絕對可以做到坐和望贏。
維拉現時在英超排名第4，可見確具實力，但首回合倒灶落敗後，就連「歐戰之王」主帥艾美利都承認晉級形勢不妙。事實上，維拉就連剛戰英超都輸波而歸，各項賽事近3場1和2負失7球，勢頹之下，今場要贏波根本有心無力。
