郭柏妍惡補打牌 齋睇唔落場
吳業坤老婆衝事業 唔急生B
無綫小花郭柏妍（Rosita）於新劇要打麻雀及拉大提琴，前晚她出席活動時表示不愛打麻雀，故牌技很差，為了演好角色，現在會觀察別人打麻雀惡補。同場的吳業坤老婆濱口愛子很開心在港拍首個廣告，又稱兩公婆現時專心事業，暫時無意生育。
郭柏妍與吳業坤的日籍老婆濱口愛子前晚出席家電產品發布會，愛子透露為產品拍攝廣告，擔任嘉賓的Rosita則於活動上跟其他來賓玩遊戲。Rosita受訪時透露近期忙拍無綫新劇《麻雀樂園》，正學習拉大提琴及打麻雀：「我打麻雀唔叻，符合晒角色設定，呢排會觀察人哋打，惡補不足。（屋企人有冇打？）新年嘅時候會，我通常企喺旁邊睇同幫手疊牌，我疊牌好叻好整齊㗎，哈哈！」她坦言對打麻雀興趣不大，不會特別去學，又指學大提琴有難度，因為雙手要同時兼顧動作。
談到同劇的李佳芯（Ali）疑在社交網「放負」，更傳《麻》劇是她的告別作，Rosita表示忙拍劇，未有留意報道，但稱與Ali合作得很開心，大讚對方厲害：「只係企喺佢隔籬都學到好多嘢。」她又稱拍攝時不覺得Ali情緒有問題：「佢之前仲帶朱古力請大家食，成個團隊好似屋企人咁，好有家嘅感覺。（慰問Ali？）我哋平時有傾偈，佢就好似大姐姐咁好照顧大家，Shaun（譚俊彥）係爸爸，佢係媽媽，唔係，係姐姐，佢真人同上鏡一樣咁靚。」
愛子預告帶父母遊港
愛子開心表示首次在港拍廣告，問到是否滿意酬勞？她笑言要問經理人，又稱若有機會，希望跟老公吳業坤一齊拍廣告搵真銀。談到日圓匯率不斷下跌，她坦言自己已在香港生活，故問題不大，但仍有部分日圓儲蓄受影響，老公也提議再購入日圓「溝淡」，不過身在日本的家人則受影響，她說：「喺日本生活直接上唔受影響，不過要去外地旅行使費會高咗。」
愛子透露父母稍後會來港旅行，因想親眼看她的肖像印在電車車身的廣告，又指父母首次來香港是參加她的婚禮，但上次行程緊密，未有時間四處吃喝玩樂，今次她會帶雙親遊覽香港。問到會否想盡快升呢人母？她表示剛開始在香港接工作，與老公都想在事業上先闖一番，造人大計稍後再想。提到老公較早時奪得空手道比賽冠軍，她笑言：「決賽嗰日老公擔心自己太緊張，唔畀我到場睇賽事，不過事前已同老公、教練一齊食飯作賽前鼓勵。」
