勝利船開餐 「細」火嘆天鵝
日本波快車中午開動
日本波今日又有快車賽期，其中衛冕日職的神戶勝利船主場迎戰下游的新潟天鵝，牌面睇勝利船理應秤先，但今季主場戰績卻嫌平平，再考慮勝利船今季進攻一直欠缺銳利，天鵝的防守表現亦較預期為佳，預計今場會是主隊小勝格局，[2.5]細盤可作今日過關3串4重心，另外兩關揀英乙升班附加賽的唐卡士打[+1]勝及里爾[2.5]大盤。
勝利船上季聯賽以7分優勢拋甩次席橫濱水手奪標，表現超班，不過新季暫時接戰11周，發揮則未達預期，至今以6勝2和3負20分排在次席，以2分差距落後「一哥」町田澤維亞。球隊11戰入16球，平均每場攻入不足1.5球，上季在射手大迫勇也爆發，配上武藤嘉紀的組合相當高效，二人全季合共攻入32球；可是今季得到宮代大聖從川崎前鋒來投，反而分薄了鋒線的球權，表面睇得分點增加，但默契其實卻要更多時間磨合，單是近3場便僅入3球，而今季主場聯賽5戰僅一勝，更有3場未有入波，也同樣令人擔心。
對手新潟天鵝目前排名15，但近況其實不差，剛戰該隊便與第4位的廣島三箭打和1:1，近4場聯賽僅逢一敗，聯賽11戰僅失13球，絕非豆腐魚腩，即使今戰未必能保得住不敗，也絕不會被大炒。最重要一點，原來兩軍近6次交手，有5次總入球都不多於兩球，次次碰頭例牌緊湊少入波，今場博細應該啱數。（開賽時間：周一12:00pm）
唐卡士打硬淨受讓筍
另外的英乙升班附加賽準決賽首回合，有常規賽第6的克魯主場對第5的唐卡士打，克魯近3場聯賽不勝，唐卡士打則是近12場聯賽10勝2和不敗，氣勢超強，今場唐軍受讓必捧。（HOT TV 76台周二12:30am直播）
尾關法甲里爾對里昂，兩軍都要為歐戰席位努力，里爾想踢歐聯，主場必會搶攻爭分，里昂要爭踢歐協聯，近期場場與對手對攻，近4場都演入球騷，今場一於再追大。（NOW 639台周二3:00am直播）
