張家輝狂讚老婆正 曲線讚自己好眼光
張家輝與周勵淇等前晚到九展出席電影《超意神探》首映禮，於片中飾演記憶力異於常人的家輝笑言：「以前喺無綫拍古裝劇，一口氣背頁零兩頁紙對白完全冇問題，不過現實中要處理自己嘅嘢，特別容易冇記性。」談到太太關詠荷早前復出拍廣告，獲網民讚保養得宜，家輝自豪說：「佢不嬲都係正。（喺屋企望住佢都話正？）有呀，我真係同佢講『你老有老靚』。我唔係氹佢，佢真係成日呈現到佢係一個好靚嘅人，如果唔係我做咩成日收埋佢喺屋企？（讚自己好眼光？）都係佢好彩啫。（咁你有冇壓力？）我本身都係一個靚仔，有咩壓力呀？你哋唔係未見過呢啲混血兒呀？番禺溝廣州，哈哈！」
提到《超》片在內地變了「網大」，家輝稱不介意：「演員崗位係做好演嘅事，唔係做決策，今次故事同人物賦予嘅元素好豐富，我諗冇乜演員攞到呢個劇本唔想去做，我作為演員竭盡所能去做，至於幾時上、咩地方上、宣傳策略，同我冇乜關係。我冇刻意唔做網大，網大都係演戲，我唔排除將來會演網大，如果遇到心動角色或班底都會參與。」
