林峯拒再露股 唔肯拍《大唐》
吳卓羲菊梓喬同場零交流
林峯前晚出席主演電影《九龍城寨之圍城》的明星優先場，老友吳卓羲與楊茜堯畀面撐場。吳卓羲坦言想跟林峯、楊茜堯重演經典作《大唐雙龍傳》，但他指林峯不肯，因對方自嘲年紀大，不想再拍當年的露股鏡頭。
電影《九龍城寨之圍城》前晚在尖沙咀舉行明星好友場，除了演員林峯、胡子彤及張文𠎀出席，林峯堂妹林夏薇、好友吳卓羲、楊茜堯、苗僑偉等亦到場支持。眾人拍照時應傳媒要求做派心動作，但由於不習慣，他們都一臉尷尬。之後吳卓羲學林峯扮Chok，即被林峯取笑是「吳Chok羲」，笑爆全場！
擔心女兒睇戲嚇親
林峯受訪時表示老婆張馨月與女兒不在港，又稱電影有不少打鬥場面，擔心女兒入場後會嚇親：「驚個女見到我俾人打會喊，通常女比較錫Daddy。」胡子彤亦稱沒有邀請家人睇戲，雖然姪仔姪女也想看，但因兩人年齡太小，覺得不適合。問到若票房好是否會派福利？林峯笑言：「老闆話事，自己係好員工，老細叫做乜就會做。」提到《九》片在內地預售票房一般，林峯表示只是剛剛開始，很多內地朋友看過宣傳片後都覺得故事吸引，有信心靠口碑帶動票房。
楊茜堯表示很久沒入戲院，故今次丟低家人來捧場。提到2003年她跟林峯、吳卓羲合演劇集《大唐雙龍傳》，楊茜堯表示很久沒跟吳卓羲合作，3人合作機會更少。問到是否想再合作？楊茜堯笑言要睇緣分：「佢哋咁忙，我就得閒啲，我只係湊小朋友，我可以交畀人湊。」吳卓羲則笑言：「就算我同楊茜堯肯，林峯都唔肯！我曾經問過佢，想再合作《大唐雙龍傳》電影版或《大唐雙龍傳2》，因為想有作品畀粉絲回憶，但佢就話唔好搞，年紀大，唔可以再露（股）。」不過他透露年底可能跟林峯合演時裝劇，但詳情仍在洽談中，故不能透露太多。
另外，吳卓羲的緋聞女友菊梓喬偕細妹到場睇戲，不過低調的她未有到記者區影相。進場後，她跟吳卓羲的座位相隔一行，亦沒有任何交流。菊梓喬心情勁靚，見傳媒拍照時舉起勝利手勢。
