現在並非炒家出擊時
湯文亮博士 紀惠集團行政總裁
今早開例會，有同事問現在是否買樓時候，我話可以分兩個層面來講，如果是自用的話，遇啱合心水以及能夠負擔得起，的確可以買，我並不是說樓價不會下跌，但作為自用，唔使等到撈底才買。
但作為一個炒家，現在並不是最佳入市時間，炒家炒樓首先是考慮供應量，如果供應不斷，即使買入價平都可能冇錢賺，甚至會蝕本，如果供應減少，甚至供不應求，才是入市良機，現在炒樓反而對樓市有不良影響，因為如果炒家撻訂或者蝕讓，就會畀人一個錯覺，以為樓市仍未見底，仲有排跌。
內房得食港業主當災
講開又講，較早前有人問我，點解香港銀行對投資者 / 業主call loan call到咁緊要，我話真相現在慢慢浮現出來，主因是港銀為了收取較高利息而借錢給內房，唔借錢畀香港投資者 / 業主，現在內房出事，剛剛就有內房被港銀清盤，而港銀為了做靚盤數，向借貸比率低於五成甚至四成的香港投資者 / 業主call loan，變成內房得食，港投資者 / 業主當災。
其實，金管局已經出到聲叫香港銀行唔好向準時還款的香港業主 / 投資者call loan，但港銀好似借咗聾耳陳隻耳，根本唔理金管局，不過，隨着撤辣之後樓市反彈，估價不再下調，銀行call loan的次數減少很多，但即使銀行現在唔再call loan，但已經令到投資者 / 業主元氣大傷。
