祖高域邦瑪迪 榮膺最佳創歷史
星光閃耀勞倫斯體育頒獎禮
第25屆勞倫斯體育大獎頒獎禮昨晨在西班牙的馬德里圓滿結束，去年贏得三項網球大滿貫的網球男子單打傳奇祖高域，力壓包括美斯、韋斯達本及夏蘭特等體壇巨星，獲選為年度最佳男子運動員，今次亦令他追平了退役前輩費達拿5度獲獎的紀錄。不過今次頒獎禮大贏家，則是西班牙女足主將邦瑪迪，她既獲選年度最佳女子運動員，而她所屬的西班牙女足國家隊亦獲選為最佳隊伍。
出席這項體壇年度盛事頒獎禮的嘉賓，可算是星光熠熠，包括前奧運飛人保特、籃球「波神」米高佐敦、退役足球巨星卡富、迪比亞路、古列治，以及前中國體操名將李小鵬等。
去年贏得澳網、法網及美網的祖高域，將個人大滿貫錦標增至史無前例的24個，正式壓過宿敵費達拿及拿度，成為網壇「山羊」（G.O.A.T.）史上最佳，最終他亦在今次選舉中力壓群雄獲獎。在頒獎禮上，祖高域說：「雖然我係獨立運動員，但每次成功背後，都要多得我家人及我個團隊嘅支持，我嘅團隊就係我成功嘅基石。2023年係我生涯其中最成功嘅一年。能夠5度獲獎係我無上光榮，諗番起2012年首次得獎，依家12年過去，我又返到嚟，反映過去一年帶畀我同我嘅粉絲幾多刺激同成功。」
女子團隊首奪最佳隊伍
至於成為史上首位以足球員身份贏得最佳女子運動員的邦瑪迪則說：「只要睇睇之前嘅得獎人，就令我變得更謙虛。由莎蓮娜威廉絲到拜莉絲，仲有禾恩同大坂直美，以至去年的費莎派絲，佢哋唔止喺自己運動出色，仲係年輕一代女仔嘅榜首。而首支女子隊獲選為最佳隊伍，都令我哋感到無比驕傲。」
