英版施多夫 「魔」童速上位
攻守全能 明奴瞄準歐國盃
在3月份國際賽期首度代表英格蘭出賽的曼聯超新星高比明奴，正以超乎球迷想像的穿梭機極速上位。踢法全面，被讚賞媲美荷蘭名宿施多夫的他，已被看好可在今夏的歐國盃決賽周大顯身手。集超強攻防技巧於一身，更具備冷靜卓越的頭腦，高比明奴的名字，由今天起大家必須記下，將是未來球壇下一位耀目巨星！
去年2月在英超作處子戰，明奴上季僅為「紅魔鬼」上陣一場，不過今季適逢傷兵問題，這位日前度過19歲生日的小將即憑出色表現持續贏得不少上陣機會，結果以在英超上陣不足廿場情況，竟已能贏得英格蘭代表隊主帥修夫基垂青，在三月的國際賽期入選大軍，最終更先以後備身份登場鬥巴西，然後再以正選上陣對比利時，這位雙親為加納人的年輕中場上位之快，雖是超出想像，但只要有欣賞過他的比賽表現，卻肯定不會有懷疑。
修夫基在國際賽期後談起明奴的表現：「同一般年輕球員情況唔同，佢將球會嘅好演出，完全帶到嚟國際賽。佢非常冷靜同強壯，喺壓力下處理得皮球好好。」與「修哥」有類似意見，還有已成為球評家的前英格蘭國腳祖高爾：「佢喺球場上作出嘅決定，遠遠好過一般18歲球員。我諗番自己18歲踢中場中嗰陣，我做嘅決定同發揮真係唔及佢。我估佢嚟緊仲會交出更多，會好似洛迪卡斯簡迪與迪格蘭賴斯咁入波，會踢得更前，佢會成為英格蘭今夏嘅主力。」
祖高爾認為明奴能夠勝任由防中到攻中的中場任何位置，而明奴亦曾透露自己的偶像包括朗拿甸奴、朗尼及簡東拿，都是在世界最頂級中場球星。曼聯及英格蘭名宿里奧費迪南更大讚道：「我感覺佢好似施多夫，我唔係話佢已經好到同施多夫一樣，或者話佢將會成為新施多夫，但我見到佢哋嘅類似特質，可以喺好緊迫嘅環境，輕鬆應對，處理好皮球，能攻擅守。」
坦哈格：唔好比較 要做自己
荷蘭名宿施多夫曾効力阿積士、皇家馬德里及意甲米蘭雙雄，曾為荷蘭國家隊上陣87次，幾乎贏盡球壇大小錦標，但曼聯主帥坦哈格則希望愛徒可以開創自己的道路：「我唔認為要將球員做比較，尤其係同偉大球員好似施多夫去比較。明奴就係明奴，佢有巨大潛質，非凡技術，我好肯定佢會有美好前景，只需要做番自己。」里奧費迪南也提出，曼聯陣內的經驗主力，應該給予明奴更多的保護，以防揠苗助長，影響其未來前景。
