色香味俱全 食為天京川滬料理
位於英皇道433至437號珠璣大廈地下B號舖的食為天，是一間主打京川滬菜式的中菜館，毗鄰港鐵北角站B1出入口，過一條馬路就見到，地理位置十分優越。店舖面積算大，裝潢亦精緻，門面光猛，枱櫈與餐具更比同類餐廳要好，坐得舒服，感覺亦好高貴，更重要是開店至凌晨2點，放工醫肚也相當容易。
是店提供了不少套餐，包括午餐、下午茶和常餐，晚市則有超值客飯，提供乾炒牛河、梅菜蒸鯇魚、魚香茄子等家常小菜。另有魚蝦蟹套餐（清蒸大海斑、白灼蝦和薑葱炒肉蟹）、海鮮孖寶（白灼蝦和清蒸大海斑）；也可散叫果皮蒸大連鮑魚、上湯焗龍蝦等。焦點菜式有剁椒魚頭（半個），魚頭製作較花時間，但真係有非等不可的理由。師傅把蒸的時間掌握得好好，因此魚頭的肉保持嫩滑，最出色的是剁椒調味，好香好惹味，可以的話，用來撈飯或撈麵仲正。
另有鐵板黑椒牛仔骨和椒鹽魷魚鬚，前者肉質非常腍身，一點也不韌，食落仲好有牛味不會太肥，而且黑椒味香濃，加上燒香了的洋葱，為整道菜式增添風味；後者新鮮彈牙，口感一流。輕盈一點也有麻辣雞絲粉皮，粉皮非常滑，雞絲數量亦不少，醬料與粉皮撈在一起食，作為前菜非常開胃。還有蒜蓉津白，蒜蓉味炒得好香，上面還鋪有炸蒜，令鮮甜的津白多了一份香味。加上坊間十分罕見的南瓜餅，不單煎得香口，食落熱辣辣又非常煙韌，而且屬於少甜，夜晚食也不怕。
除了廚房的出品外，就連水吧的餐飲也很出色，奶茶唔苦、檸茶又沒有澀味，調味好好，整體出品做到色香味俱全，下次收晏咗可以再幫襯。
