吳若希帶老公出街 被嘲似放狗
蕭正楠唔講大話 演渣男有難度
蕭正楠、吳若希、賴慰玲與朱敏瀚等聯同監製林瑋澄及編審黎倩儀，前晚出席無綫劇《奔跑吧！勇敢的女人們》的煞科宴，吳若希老公偕一對子女到場，搞笑是吳若希表示：「今晚有帶老公出嚟。」即被阿蕭取笑用錯形容詞似「放狗」，笑爆全場！
蕭正楠與吳若希於《奔跑吧！勇敢的女人們》飾演夫妻，吳若希透露此劇除了讚揚女性勇敢外，阿蕭亦很大膽出軌，阿蕭笑言：「我肯接呢個角色就真係好勇敢，因為我演渣男，竟然要對一個天真又傻嘅老婆講好衰嘅說話，仲為咗小三要對太太講大話，呢啲對白對我嚟講有難度，所以拍得好唔舒服，多得吳若希係好有反應嘅演員，拍攝嗰陣佢不斷NG同笑，成為我嘅動力！」
眾所周知，阿蕭與黃翠如是恩愛夫妻，現實中是否也不敢向太太講大話？阿蕭坦言與太太是最好的朋友，大家都沒秘密，覺得夫妻之間信任很重要，少少猜疑也會令婚姻蒙上污點。他隨即取笑吳若希現實中是勇敢的女人，因為夠膽鬧老公。
賴慰玲合照遭欺負
吳若希笑言角色與現實的自己很不同：「劇中我極度仰慕老公，老公就係我嘅唯一，但現實中老公只係我一部分。的確拍拖嗰陣會仰慕另一半，但婚後就發覺老公似小朋友，我似多咗個仔，而且已經冇咗拍拖嘅感覺，反而老公問過點解唔同佢拍拖，所以今晚有帶老公出嚟。」在旁的阿蕭聽到「帶」字即說：「你講到好似放狗咁！」搞到吳若希笑到面紅。她笑指老公真的很喜歡黐實她，亦是夫妻之間的默契，又爆老公會爭寵，每次她錫囝囝時，老公即要跟她錫錫。
另外，賴慰玲跟阿蕭、吳若希和朱敏瀚合照時，遭3人齊齊趷高腳「欺負」！賴慰玲直認因高度問題，被導演要求穿6吋高踭鞋拍攝，她笑言：「其實唔係我矮，只係兩個男仔太高，加上吳若希超過1米70，女仔嚟講算高。」
