許冠傑憑歌寄意 向張國榮致敬
「歌神」許冠傑（Sam）一連三場紅館騷前晚圓滿落幕，適逢是張國榮（哥哥）離世21周年的日子，他專誠為天國的哥哥獻唱一曲致敬。Sam說：「我特別揀咗一首佢嘅歌送畀佢，希望佢喺天國都聽到，係 《有誰共鳴》。」他特別將最後一句歌詞改為「夜闌靜問哥哥可感應」，以歌聲向哥哥傳達思念之情。
當晚表演嘉賓是梁詠琪（Gigi），Sam以最疼錫的契女來形容對方，並一齊唱英文歌《Somewhere Out There》，唱畢後，Sam提議與Gigi多唱一首中文歌，Gigi說：「不如我哋唱《夜半輕思語》，好唔好？」二人便牽着手合唱。演唱會尾聲，Sam感觸說：「以下呢首歌真係代表我嘅心聲，因為大家嘅熱情，我先可以站喺舞台， 將呢一首《珍惜》送畀大家。」他唱完此歌後繞場一周向觀眾致謝，懷着不捨心情離開舞台。
