外地買樓唔好造按揭
湯文亮博士 紀惠集團行政總裁
朝早去茶餐廳，有客人問我在外地有冇買樓，申請造按揭難唔難，我好耐之前已經買了，現在北京、紐約、吉隆坡、台北等地仍然持有物業，包括一些舖位，但從來冇造按揭，試過申請，問完一大堆問題之後就唔批，就算批都要畀較高利息，買新樓能夠造按揭的機會較大，因為發展商會做擔保。
客人話今次真係中伏，在外地買了一個二手單位，代理當時話乜都得，但結果係唔得，又唔係唔得，有幾個要求，其中一個是要求客人做一個大約與貸款金額相同的定期存款，如果做唔到就唔批，所以，唔批是客人責任。
有錢最好一次付清
老闆話，定存與貸款要小心處理，在外地最好不要問銀行借錢買樓，因為銀行會隨時call loan，香港都會，其他地方點解唔會，千祈唔好以為可以將定存抵消call loan金額，在銀行方面，定存還定存，如果提早攞定存是違法，貸款還貸款，銀行是有權隨時call loan，在外地買樓，有錢的話，最好一次付清。
講開又講，上周三美聯儲局雖然冇減息，但美股表現反而好似減咗息咁樣，大升401點，而日本雖然脫離負利率，但日圓反而下跌，真係世事難料。其實今次美聯儲局雖然冇減息，但釋放減息信號強烈，並且表明今年會減3次息，嚴格來說，比減息更好，所以，美股才會大升，現在萬眾期待，美國開始減息。
